Por Europa Press / Redacción | SANTIAGO DE COMPOSTELA | 18/06/2020 | Actualizada ás 14:40
O vicepresidente da Xunta, Alfonso Rueda defendeu a intención da Xunta de "preservar absolutamente o medio ambiente" no acto da firma dun novo convenio con ENCE. Rueda incidiu na vontade do executivo de Feijóo de conservar o "tesouro" que representa o litoral galego cando aínda non se cumpliron dúas semanas das derradeiras mobilizacións ecoloxistas contra a empresa, que ocupa terreos públicos na ría de Pontevedra.
Paralelamente, o segundo de abordo do goberno popular cargou contra o executivo central pola nova Lei do Cambio Climática, que modifica a vixente de Lei de COSTAS. O vicepresidente acusou ó goberno de coalición de "crear alarma" e xerar "inseguridade xurídica"."Outra vez volvemos ver como se pon en cuestión a permanencia de moitísimas empresas que crean emprego no noso litoral", sinalou o número dous do Executivo galego, quen censurou que a noticia chega "no peor momento", posto que "había que estar a pensar en todo o contrario: en asentar os postos de traballo, en asentar as industrias".
Rueda denunciou que a norma deixa ós traballadores "inmersos nese ambiente de inseguridade xurídica", que é "o peor que pode haber para novos investimentos e o mantemento dos investimentos que hai".
RESPOSTA DO PSDEG
O vicesecretario xeral do PSdeG e cabeza de lista ás eleccións autonómicas pola Coruña, Pablo Arangüena, denunciou en Muros a "campaña de difamación e mentiras" do PP e da Xunta en relación á normativa de costas, en alusión ás declaracións realizadas polo vicepresidente da Xunta, Alfonso Rueda. Así o trasladou, segundo informa o partido nun comunicado, nun encontro coa militancia celebrado nesta localidade coruñesa e dirixido --subliñou-- a "desmontar as falacias vertidas polo PP contra o Goberno".
O responsable socialista defendeu que, lonxe da versión do PP, "a única alusión á costa do Proxecto de Lei de Cambio Climático refírese a que as concesións teñen un prazo máximo de 75 anos, ademais de que nada impide a súa renovación unha vez esgotadas". Por iso, censurou a "interpretación torticeira e disparatada dun artigo" do proxecto de lei por parte do PP e do Goberno galego.
"Con todo, omite que, a instancias do PSdeG, o Ministerio comprometeuse a modificar a normativa de costas da man do sector e comprometeuse explicitamente a favorecer de todas as formas posibles o mantemento das explotacións económicas asociadas á costa de Galicia", contrapuxo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.