A Xunta cobra 125€/mes por terraza de catro persoas en zonas portuarias en mal estado a pesar da crise
O Goberno galego só aliviou o pago de taxas entre o 14 de marzo e o 11 de maio cando en toda Galicia non se podían utilizar as terrazas.
Por Galicia Confidencial | Fisterra | 19/06/2020 | Actualizada ás 13:59
A taxa de Portos de Galicia, organismo dependente da Xunta, por unha mesa de 4 persoas na terraza no Porto de Fisterra custa 125€/mes. Un prezo que se mantén no verán a pesar da crise do coronavirus e as múltiples chamadas que ten feito o presidente galego ao Goberno central para que facilite a reapertura económica.
De feito, empresas hosteleiras de Fisterra denuncian que teñen chegado a pagar 11.000€ ao ano por poder ter a súa terraza no porto fisterrán. Unhas cfras que din que son “desorbitadas” tendo en conta que unha terraza municipal pode chegar a custar entre 400e 500 euros por temporada.
De feito, os hosteleiros de Fisterra pagan unhas taxas de Portos de nivel 1, a mesma categoría que Sanxenxo ou Vilagarcía con menos da metade dos servizos. Porque o que máis indigna á hostalería de Fisterra é o estado do porto. “O problema é que con todo o que cobran, o estado do porto cada vez vai a peor”, denuncian tal e como recolle QPC.
Así, critican que os sumidoiros rebosan polos baños dos establecementos cando chove; moitas das cubertas que están esfoladas e teñen pingueiras; as antenas wifi funcionaron só un ano ou que as barandas de protección están enferruxadas. Ademais din que tampouco teñen permiso para facer melloras nas terrazas, nin sequera parapintar o chan.
A XUNTA SÓ ALIVIOU O PAGO NOS MESES DO ESTADO DE ALARMA
As taxas municipais foron eliminadas durante todo o ano. Pero a sorpresa chega co anuncio de Portos de Galicia, que anuncia a súa medida estrela para axudar á hostalería: “Os propietarios dos negocios de hostalería con terraza ao aire libre en espazos portuarios quedarán exentos do pago das taxas correspondentes ao período entre o 14 de marzo e o 11 de maio”. É dicir, durante os meses nos que era imposible ter abertas terrazas en Galicia polo estado de alarma.
RECOLLIDA DE SINATURAS
A día de hoxe a hostalería de Fisterra está recollendo sinaturas, alegando que “a diminución do número de mesas e aforo interior nos locais de hostalería fai que o uso das terrazas sexa imprescibdible á hora de tratar manter os negocios e os postos de traballo directos e indirectos ligados a este sector”.
”É incomprensible como a Xunta, concretamente Portos de Galicia, lonxe de axudar aos negocios anulando de xeito excepcional as taxas mentres duren os efectos da pandemia, decide cobrar incluso o espazo que teñen que ocupar para manter as distancias sociais obrigatorias por normativa de prevención”, continúa a carta.
Lembran que as taxas de Portos triplican ás municipais, e que moitos concellos anularon as taxas durante o 2020. Lembran a dependencia nun 70% da temporada estival.
