Ence defende que non usa produtos incompatibles coa súa autorización ambiental

A planta de Ence en Pontevedra defendeu este mércores que "cumpre toda a regulación vixente" e negou que utilice de forma ilegal aceites usados como combustible.

Isto, sinalou nun comunicado, é "unha grave acusación" e reivindicou que "cumpre escrupulosamente a súa Autorización Ambiental Integrada" e non utiliza "combustibles nin ningún outro produto incompatible coa mencionada autorización". O documento, agregou, "avala e garante, precisamente, que o comportamento ambiental da planta cumpre plenamente con toda a normativa ambiental autonómica".

Este martes Ecoloxistas en Acción deu unha bandeira negra ás instalacións de Ence na ría de Pontevedra "pola combustión de aceites usados na planta de biomasa de Ence". A empresa replicou este mércores que cumpre a orde ministerial que regula o uso como combustible de aceite procesado e esixe a todos os seus provedores un certificado que avale que tamén cumpren esta norma.

Esta actividade, agregou Ence, "supón un exemplo de contribución" á economía circular, "ao reutilizar e dar un novo valor aos subproductos que utiliza para operar. A planta, reivindicou, conta con "destacados recoñecementos ambientais internacionais", como a Distinción Ouro da Comisión Europea e a ecoetiqueta Nordic Swan.

Planta de Ence en Pontevedra. EUROPA PRESS - Arquivo