O comercio da Mariña pon en marcha campañas de promoción para reactivar a campaña de verán tras o rebrote

A Mariña Federación, que agrupa a asociacións de comercio da comarca da Mariña, da man da Mancomunidade de Municipios e coa colaboración da Xunta e a Deputación de Lugo, puxo en marcha accións de promoción de cara a reactivar o sector tras o rebrote e o peche pola pandemia.

Deste xeito, establecementos da Mariña organizan durante as próximas seis semanas de verán a campaña 'Degusta A Mariña lucense', coa que locais de toda a zona celebrarán cada fin de semana unhas xornadas gastronómicas dedicadas a produtos da comarca.

As primeiras xornadas en celebrarse serán as da pescada do petisco de Celeiro, que terán lugar este fin de semana, do 24 ao 26 de xullo. As mesmas pretenden ser unha homenaxe á festa que a finais de xuño dedícase a este produto nesa localidade.

Tras iso, a primeira fin de semana de agosto será a quenda do bonito do norte, en referencia á Feira do Bonito de Burela. Seguiranlle as xornadas do Marisco, en honra das mariscadoras da costa de Lugo; e as dedicadas á tenreira galega, as da horta e as do peixe do día, coas que tamén se pretenden homenaxear ás granxas e gañado da comarca, a festa da Faba de Lourenzá, e aos mariñeiros respectivamente.

Segundo explicou o presidente da Federación, José Carlos Paleo, a campaña pretende suplir "na medida do posible" a cancelación, por mor da pandemia, das grandes citas da comarca que atraen miles de visitantes á zona e que supoñen "importantes ingresos para a hostalaría e o comercio de toda a zona".

Así mesmo, Paleo indicou que as xornadas "están a levantar interese" e sinalou que "a idea é que se antes veciños de toda a comarca gozaban destas celebracións, agora tamén toda A Mariña poida degustar estes produtos".

CAMPAÑA TURÍSTICA

De forma paralela, a mancomunidade activará unha campaña turística baixo o lema 'Volve atopar o teu Norte', coa que pretende atraer visitantes á zona. Trátase dunha iniciativa que contará coa colaboración de rostros coñecidos de mariñáns que viven fóra e a través de redes sociais convidarán a visitar a zona, resumiu Paleo.

O presidente da Federación puxo de relevo a importancia destas accións para "normalizar" a campaña de verán e consdierou que, tras o levantamento das restricións á mobilidade nos concellos da Mariña, de momento menos en Burela, as rúas da comarca están a recobrar o pulso.

"Estabamos nunha situación moi delicada, pero móvese xa máis xente", sinalou á vez que confiou en que agosto "contribúa mellorar as cousas, a pesar da ausencia de actos multitudinarios".

Ao mesmo tempo, insistiu en que o obxectivo destas campañas é "pór en valor os recursos" e que "a comarca faga a vida diaria con normalidade, reactivar a chegada de visitantes e de quen teñan segunda residencias na zona".

Ás anteriores campañas sumar, no caso de Foz, a terceira edición do 'Comercio na Rúa', na que os establecementos dese concello sacan ás rúas a súa mercadoría con prezos reducidos e promocións.