Marea Atlántica acusa ao goberno local da Coruña de "falta de iniciativa" ante a perda de conexións en Alvedro
Esta formación preguntará no próximo pleno polas xestións para manter as conexións co aeroporto herculino.
Por E.P. | A CORUÑA | 26/08/2020 | Actualizada ás 18:43
Marea Atlántica denunciou "falta de iniciativa" do goberno local ante a perda de conexións no aeroporto coruñés, segundo puxo de manifesto tras unha reunión co comité de empresa de Alvedro.
No encontro estiveron presentes os portavoces municipal e provincial de Marea Atlántica, María García e Alberto Lema, respectivamente, quen, en rolda de prensa, cualificaron de "crítica" a situación do aeroporto.
Tamén denunciaron "falta de iniciativa e compromiso" por parte do goberno local. O resultado, para os representantes de Marea Atlántica, é "a perda de conexións con Londres, Málaga, Valencia e Bilbao", ao que sumaron a redución de frecuencias nas principais liñas.
"Alvedro terminou 2019 cunha marca histórica de 1,3 millóns de viaxes, un 10,3% máis que o ano anterior e 44 meses consecutivos de mellora", apuntou María García, quen engadiu que desde aquela "só recibe malas noticias e perda de voos e servizos".
Sen descartar o "impacto obvio" da pandemia, considerou que este é "maior" que noutros aeroportos, o que atribuíu á "parálise" do goberno local. Mentres, Lema anunciou que esta formación preguntará no próximo pleno polas xestións para manter as conexións en Alvedro.
Pola súa banda, o presidente do comité de empresa, Gustavo García, reivindicou que "a boa saúde" do aeroporto é "decisiva para a recuperación económica da comarca" e denunciou que o aeroporto "perde entre o 45 e o 50% dos usuarios" desde o inicio deste ano.
