Galicia, ¿nación?
Finalmente, o secretario xeral do PSdeG, Emilio Pérez Touriño, desepexou hoxe as dúbidas do seu partido en torno a definición de Galicia no vindeiro Estatuto. "Confío en que o novo Estatuto concile a definición de nacionalidade histórica que a Constitución establece para Galicia co recoñecemento expreso da súa identidade nacional"...
Por Galicia Confidencial | Galicia | 08/06/2006 | Actualizada ás 23:39
Neste senso explicou que ésta foi a fórmula que se utilizou no Estatut, xa que, aínda que denominou a Cataluña como nación no Preámbulo, no articulado "asumiuse a definición que actualmente ten na Constitución", é dicir, nacionalidade histórica. "O Estatuto andaluz recolle outro camiño, pero vai na mesma dirección", sinalou.
A aclaración do presidente galego chega nun momento no que varios dirixentes do seu partido, como o conselleiro da Presidencia, José Luis Méndez Romeu, o pasado luns; ou o alcalde de Lugo, José Clemente López Orozco, hoxe na Comisión para a Reforma do Estatuto, se decantaron polo termo nacionalidade histórica.
Sen embargo, o propio Touriño recoñeceu hai uns meses en Madrid e, ante varios ministros e o secretario de Organización do PSOE, José Blanco, que o Estado español estaba formado pola "acomodación" de varias "nacións" e que era "imprescindible" abandonar a "insostible ecuación: Nación igual a Estado".
Asemade, tanto o PSOE como o BNG explicitaron no pacto de goberno a súa intención de que o Estatuto recoñeca o "carácter nacional" de Galicia.
Entre os socialistas non hai unanimidade á hora de denominar a Galicia no futuro Estatuto, unha dúbida que, moi probablemente, despexará Touriño no pleno extraordinario que abordará, precisamente, a reforma estatutaria.
En todo caso, hai fórmúlas que poderían contentar a PP, PSOE e BNG das que xa falan tanto dende a dereita como dende a esquerda. É o caso do ex euro deputado Camilo Nogueira, ou do ex rector da Coruña, José Luis Meilán Gil, quenes apostan por recoller a terminoloxía 'nazón de Breogán' que aparece no himno galego e que foi aprobado e aceptado por unanimidade por todos os partidos no primeiro pleno da Cámara galega.
A mesma terminoloxía foi recomendada pola presidenta da Fundación Rosalía de Castro, Helena Villar Janeiro, na Comisión para a Reforma do Estatuto.
