Suspendido o partido de baloncesto Obradoiro-Fuenlabrada por un positivo no equipo compostelán
O resto dos xogadores agardan, agora, os resultadas das novas PCR.
Por Europa Press / Redacción | Compostela | 19/09/2020 | Actualizada ás 13:00
O duelo Monbus Obradoiro-Urbas Fuenlabrada, igual que o Iberostar Tenerife-Casademont Zaragoza, ambos os correspondentes á primeira xornada da liga Endesa, foron suspendidos por un positivo na expedición compostelán e outro na aragonesa, confirmaron ambos os clubs este sábado.
"A ACB comunícanos oficialmente que o encontro desta tarde contra o Urbas Fuenlabrada será aprazado pola detección dun positivo no noso equipo. Como marca o protocolo, o persoal ao completo xa repetiu a proba", comunicou o Monbus Obradoiro.
Posteriormente, era o club maño o que informaba da mesma decisión no seu partido. "Tras as probas PCR realizadas ao equipo de Casademont Zaragoza de Liga Endesa, cuxos resultados se coñeceron a última hora da noite deste venres, a expedición non viaxou este sábado a Tenerife ao detectarse un positivo por COVID-19", confirmou.
"O equipo, seguindo o protocolo marcado pola ACB e o CSD, atópase á espera de coñecer o resultado das novas probas efectuadas á primeira hora deste sábado para poder, no seu caso, disputar o encontro ante o Iberostar Tenerife en próximas datas", engadiu.
Desta maneira, non se poderá disputar o duelo fixado para este sábado ás 18,00 horas no Multiusos Fontes do Sar de Santiago de Compostela entre o Monbus Obradoiro e o Urbas Fuenlabrada, nin o previsto o domingo ás 12,45 horas no Santiago Martín de San Cristóbal de La Laguna, entre o Iberostar Tenerife e o Casademont Zaragoza.
Con isto, xa son tres os partidos suspendidos da xornada inaugural, despois de que este venres o partido entre o Joventut de Badalona e o Unicaja, previsto para este sábado ás 18.00 horas no Palau Olímpic de Badalona, fose aprazado ata o luns ás 20,30 horas por un positivo no equipo visitante.
