O Banco de España rexeita unha reclamación con 124.000 sinaturas contra as comisións de Abanca
O Sindicato Labrego denuncia a complicidade do Banco de España con estas prácticas e di que "lexitima un engano".
Por Galicia Confidencial | Compostela | 19/09/2020 | Actualizada ás 17:05
O Banco de España desestimou a reclamación contra as súas comisións abusivas tras a reclamación interposta por unha das afectadas, Yolanda López, avalada con máis de 124.000 sinaturas e apoiada polo Sindicato Labrego Galego e a Asociación Galega de Consumidores e Usuarios (Acouga).
Nunha resposta por escrito a Yolanda López, o Banco de España rexeita a reclamación de comisións abusivas acolléndose ao artigo 18.1 da Lei 7/2012 sobre resolución de litixios en materia de consumo. Este di no seu apartado b) que se desestimará “se a reclamación resultase manifestamente infundada ou non se apreciase afectación dos dereitos e lexítimos intereses do consumidor”.
Tamén alude a que a Comisión Nacional do Mercado de Valores valida igualmente o rexeitamento das reclamacións cando “non se refiran a operacións concretas”. Neste senso, o Banco de España argumenta que a reclamación persoal de Yolanda xa foi atendida por Abanca e que, polo tanto, non aprecia incumprimentos da normativa de transparencia e protección da clientela nin das boas prácticas. A maiores, desestima tamén a petición de que deixen de aplicarse as comisións abusivas escusándose en que a acción do Banco de España non pode estenderse “a feitos futuros con respecto á reclamación presentada”.
CRÍTICAS DO SINDICATO LABREGO GALEGO
Nun comunicado, o Sindicato Labrego Galego di que esta resposta "é indignante", xa que lexitima "todos os abusos que cometeu Abanca coas súas comisións e que ficaron sen resolver por non existir reclamación". Así, lembra que hai moitas persoas afectadas que non reclaman por non ter que "iniciar un enleado proceso burocrático para o que non toda a xente ten o tempo libre necesario ou, simplemente, porque non saben como facelo".
"Ademais, tamén lexitima un engano, pois moitos e moitas clientes abriron no seu día unha conta en Abanca, precisamente, porque non lles cobraban comisións por facelo ou por mantela aberta; e tamén lexitima a impunidade dunha das partes, a máis poderosa, para modificar unilateralmente unha relación contractual ao seu favor sen que teña a máis mínima consecuencia", engade.
Finalmente, o SLG critica que Abanca opera en amplas zonas de Galiza en "réxime de monopolio, o que favorece a súa posición de abuso. Cómpre ter en conta que Abanca está presente en 274 concellos. "Nestes 121 concellos rurais, as vítimas das súas comisións non teñen alternativas bancarias para zafarse do abuso", conclúe.
