O TUE avala a decisión de Bruxelas que en 2013 declarou ilegais as axudas españolas aos estaleiros

O Tribunal Xeral da Unión Europea (TUE) avalou este mércores a decisión de 2013 da Comisión Europea que declarou ilegal o sistema español de bonificacións fiscais ('tax lease') para os investidores en estaleiros e obrigou a España a recuperar o diñeiro.

A Xustiza europea fallou así nun novo capítulo dun asunto que se remonta a 2013, cando o entón comisario de Competencia, Joaquín Almunia, pediu ás autoridades españolas que recuperasen as axudas ilegais concedidas aos estaleiros entre 2007 e 2011 tras concluír que este réxime vulneraba as normas da UE en materia de axudas públicas.

O Ministerio de Facenda que capitaneaba nese momento Cristóbal Montoro calculou que as axudas que foran concedidas baixo este sistema fiscal e que debían ser recuperadas ascendían a 126 millóns de euros. No entanto, a resolución coñecida este mércores aínda pode ser recorrida ante o Tribunal de Xustiza da UE, a instancia superior, nun prazo de dous meses e dez días a partir da notificación.

O sistema denunciado fai sete anos polo Executivo comunitario permitía financiar, mediante unha estrutura xurídica e financeira específica, a construción de buques marítimos polos estaleiros e a súa adquisición polas empresas navieras cun desconto sobre o prezo do buque. Para iso, interviñan como intermediarios unha sociedade de 'leasing' e unha agrupación de interese económico (AIE).

En primeiro lugar, o tribunal de Luxemburgo sinalou que o réxime fiscal estaba baseado nun sistema de autorización previa con "criterios vagos" que requirían "unha interpretación que podía levar a cabo sen quedar suxeita a ningunha directriz".

NAVANTIA

Por outra banda, o vicepresidente segundo da Xunta e titular de Economía, Francisco Conde, advertiu este mércores de que o estado do estaleiro público de Navantia en Ferrol é "límite" e, ante a "situación de urxencia", pediu ao Goberno central que use fondos do plan europeo para a recuperación fronte á pandemia para financiar o dique seco, "unha infraestrutura estratéxica".

No pleno, en resposta ao parlamentario popular José Manuel Rei Varela, quen instou á Xunta a "seguir defendendo" os intereses de Galicia, Conde constatou que o Goberno ten "unha débeda con Ferrol e co sector naval".

Así, tras remarcar que a entrega recente dun buque á Armada australiana é "unha boa noticia" que evidencia "o bo facer" da industria ferrolá, advertiu de que a situación do estaleiro é "límite" e require de "unha reacción inmediata" por parte do Goberno". "A ocupación da factoría de Ferrol está a esgotarse", advertiu.