Ferido o condutor dun camión tras saír da vía en Trasmiras

Os Bombeiros de Xinzo liberaron este mércores ao condutor dun camión que quedou atrapado tras sufrir un accidente de tráfico en Trasmiras.

Segundo a información do 112-Galicia, o suceso ocorreu sobre as 13,00 horas do mediodía na A-52, cando o camión saíu da vía, envorcou e caeu por un terraplén.

Ata a zona desprazouse persoal sanitario do 061, así como efectivos dos Bombeiros e a Garda Civil de Tráfico. Ademais, tamén acudiron os Bombeiros de Verín que, tras liberar ao home, axudaron aos compañeiros de Xinzo na evacuación do ferido ata onde o esperaba o persoal médico da aeronave que os servizos sanitarios desprazaran ao lugar dos feitos.

Con todo, foi necesaria a interrupción do tráfico nesa estrada, dirección Ourense, para facilitar o traballo dos servizos de emerxencias.

Os profesionais do parque comarcal de Xinzo comunicaron ao 112 que, cando estaban a excarcerar ao ferido, produciuse unha vertedura de combustible procedente do vehículo e chegou a un regato próximo. Por iso, deron aviso á Confederación Hidrográfica do Miño-Sil, ao persoal de Medio Ambiente da Xunta de Galicia e á Policía Nacional. Do mesmo xeito, foron informados os axentes do Seprona, que tamén se desprazaron ao lugar para valorar a magnitude da vertedura.

O servizo de bombeiros da Coruña incorpora un sistema de comunicacións digit. CONCELLO DA CORUÑA