O Foro La Toja blíndase a partir deste xoves coa presenza de presidentes, ex presidentes e o rei español

O Rei Felipe VI abre este xoves 1 de outubro o Foro La Toja, que na súa segunda edición abordará asuntos como a dixitalización e o reto de gobernar en tempos de pandemia. O presidente do Goberno, Pedro Sánchez, será o encargado da clausuara, o sábado 3. Xunto a Felipe VI, encargarase da apertura o presidente da República de Portugal, Marcelo Rebelo de Sousa, nun conclave que este ano se dividirá entre parte presencial e virtual.

O exministro Josep Piqué e o presidente do grupo Hotusa, Amancio López son presidente e impulsor do foro, que, entre outros asistentes, este ano contará cos expresidentes Mariano Rajoy e Felipe González, Enrico Letta, Alberto Núñez Feijóo, Luís de Guindos, Josep Borrell, Ángel Gurría e Antonio Garamendi, así como o presidente de KPMG, Hilario Albarracín.

A semana pasada, na súa presentación, Amancio López aludiu á situación complicada pola pandemia para subliñar que os organizadores se preocuparon polas medidas de seguridade.

Pola súa banda, Piqué sinalou algunhas das cuestións que analizará este ano a cita, como tendencias previas á irrupción da covid-19 pero que agora se aceleran como a dixitalización. O "vínculo atlántico", segundo dixo, será clave nesta edición, con varios relatores procedentes de Portugal.

Pedro Sánchez clausura o I Foro A Toja-Vínculo Atlántico | Fonte: Europa Press