Por Europa Press / Redacción | SANTIAGO DE COMPOSTELA | 30/09/2020 | Actualizada ás 21:40
O conselleiro de Cultura, Educación e Universidade, Román Rodríguez, elevou este mércores unha queixa formal á ministra do ramo, Isabel Celaá, en rexeitamento co Real Decreto lei aprobado este martes en Consello de Ministros e publicado este mércores no BOE, que recolle a posibilidade de que os alumnos poidan pasar de curso sen límite de materias suspensas.
Na misiva, Rodríguez censura que esta medida "rompe" coa igualdade de oportunidades para o alumnado e "mingua a calidade educativa", e lamenta "a falta de información" por parte do departamento estatal "nun asunto de tanta transcendencia".
"Desprestixia a propia educación e o traballo de docentes e familias, vai en contra da cultura do esforzo e é profundamente antiequitativo", insistiu o conselleiro galego, que alerta do risco de crear desigualdades en función do lugar de residencia e de xerar "inseguridade xurídica e confusión normativa".
Neste sentido, a comunidade galega traballará para que o sistema educativo "Nos e vexa afectado por unha normativa estatal que desprestixia a calidade" do mesmo.
DIVISIÓN SINDICAL
Pola súa banda, os sindicatos mostráronse divididos á hora de dar a súa opinión sobre o novo real decreto. Así, desde o sindicato STES consideran que esta medida é "enormemente polémica". "O único que xera é unha gran confusión normativa e unha inseguridade xurídica enorme nun terreo tan sensible como é este", aseguran a Europa Press desde STES.
Pola súa banda, o sindicato CSIF pide a dimisión da ministra de Educación e Formación Profesional, Isabel Celaá, por "ocultar" ao Consello Escolar e aos representantes dos traballadores estas medidas contempladas no Real Decreto Lei. Tamén o sindicato ANPE está en desacordo coa nova norma, xa que sinala que non se pode deixar a responsabilidade de regular os criterios de promoción e titulación ás comunidades autónomas e de modificalos aos centros.
Pola contra, a responsable de educación de UGT, Maribel Loranca, considera "razoable" a medida, xa que entende que se aprobou dada a situación extraordinaria que vivimos pola pandemia e porque non se pode garantir a educación presencial en todos os niveis e etapas educativas "por falta de vontade política e investimento".
Na mesma liña manifestouse CCOO. O secretario xeral da Federación de Ensino deste sindicato, Francisco García, xustifica esta medida á excepcionalidade da situación actual e as consecuencias derivadas diso, como é a adopción de modos de ensino semipresenciales e a posibilidade de que os alumnos teñan que gardar corentena.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.