A Deputación de Pontevedra agarda chegar ás 500 adopcións de animais este 2020, máis que abandonos
O CAAN rexistra ata a data 411 adopcións e a presidenta provincial marca o reto de chegar ás 500 en todo 2020.
Por Europa Press / Redacción | PONTEVEDRA | 04/10/2020 | Actualizada ás 19:01
A Deputación de Pontevedra súmase á conmemoración do Día Mundial dos Animais, celebrado este domingo 4 de outubro, a través dunha campaña 'en liña' en redes sociais centrada no seu Centro de Acollida e Protección (CAAN) co obxectivo de fomentar as adopcións e condenar o abandono.
En concreto, tal e como indica a presidenta da Deputación, Carmela Silva, esta iniciativa vira ao redor dun vídeo que busca "fomentar as adopcións e insistir nos chamamentos" a unha secuela que "embrutece" á sociedade: os abandonos.
Neste sentido, Silva remarca o "firme compromiso" do seu goberno coa defensa dos animais, "en consonancia cos obxectivos dunha provincia sustentable e respectuosa coa natureza e coas especies que a habitan". "A perda da biodiversidade está a esnaquizar o noso planeta, por máis que haxa negacionistas que non o queiran ver e que non tomen decisións para que podamos cambiar a forma de relacionarnos co planeta. Nesta pandemia démonos conta de que eramos bastante menos poderosos do que criamos. Somos vulnerables", manifesta a presidenta.
411 ADOPCIÓNS EN 2020
Con motivo do Día dos Animais, Carmela Silva destaca que o CAAN da Deputación leva este ano un total de 411 adopcións --ata o 1 de outubro--, polo que o 2020 vai camiño de superar as 466 de todo o 2019, que xa supuña unha marca.
"O noso obxectivo é chegar aos 500 animais adoptados e cremos que imos alcanzar esta cifra. Estes datos supoñen unha media de 1,4 adopcións diarias, por tanto está claro que as campañas funcionan porque está a haber moita concienciación", celebra a presidenta provincial.
Na outra cara da moeda, a Deputación sitúa os abandonos, algo "intolerable". De feito, ata outubro, o persoal do CAAN recolleu 894 animais, dos que 421 foron devoltos ás súas familias. "O ano pasado as recollidas foron 1.332 e desta forma parece que en 2020 vai haber máis adopción e menos abandono. É unha boa noticia, pero temos que chegar ao abandono cero", agrega Silva.
