Galicia, a autonomía con máis accidentes de transporte escolar

Galicia atópase entre os territorios con máis accidentes de vehículos de transporte escolar do Estado. É unha das conclusións do informe 'Transporte escolar: viaxan seguros os nosos fillos? Accidentalidade, normativa e percepción social na era COVID', realizado pola Fundación Línea Directa en colaboración coa Fundación Española para a Seguridade Viaria (FESVIAL).

Galicia (21%), Andalucía (16%) e a Comunidade Valenciana (14%) son as comunidades autónomas con máis accidentes de transporte escolar. No lado contrario, áchanse Cantabria, A Rioxa e o País Vasco, con só un accidente deste tipo de vehículos nos últimos 5 anos.

En relación coas cifras de accidentalidade, a investigación destaca que os últimos 5 anos rexistráronse 136 accidentes nos que non houbo falecidos e producíronse 5 feridos de gravidade. "De feito, este medio de transporte leva desde 2012 sen rexistrar un só falecido en accidente de tráfico", subliñan.

O accidente tipo no que ven implicados os autobuses escolares en España adoita suceder, segundo o informe, en vía interurbana (58%), por colisión frontolateral (20%) e sobre todo no traxecto de volta a casa. Ademais, o mes con máis incidencias adoita ser outubro, coincidindo coas primeiras semanas da 'volta ao cole'.

Sobre as infraccións presentes nos accidentes de forma máis habitual, a investigación apunta que son a distracción (22%), non respectar a prioridade (18%), a velocidade inadecuada (10%) e non manter a distancia de seguridade (7%).

Por outro lado, máis do 60% dos pais españois non queren utilizar os autobuses escolares por medo ao contaxio de coronavirus. Neste contexto, o estudo mostra que un 19% dos proxenitores só usaría este medio de transporte se se lle garante o cumprimento de todas as normas sanitarias e hixiénicas deste medio de transporte que, segundo o informe, cada día utilizan 630.000 nenos españois para ir ao colexio.