A Xunta incoará expediente sancionador á empresa explotadora do encoro do Eume pola turbidez do río

Recorda que "desatendeu os requirimentos efectuados desde Augas de Galiciaen relación á xestión da presa".

Por Europa Press / Redacción | Santiago de Compostela | 15/10/2020 | Actualizada ás 17:41

Comparte esta noticia

A Xunta, a través de Augas de Galicia, incoará expediente sancionador á empresa explotadora do encoro do Eume --Endesa-- pola situación de turbidez xerada no río e polas afeccións ao abastecemento de Pontedeume.

Instalación de barreiras no río Eume, onde verteduras obrigaron a prohibir o consumo de auga en Pontedeume
Instalación de barreiras no río Eume, onde verteduras obrigaron a prohibir o consumo de auga en Pontedeume | Fonte: Xunta.

A Consellería de Infraestruturas e Mobilidade explica que abrirá expediente á empresa por "desatender os requirimentos efectuados desde Augas de Galicia en relación á xestión da presa" e tamén incoará a sanción que corresponda, en función da valoración dos danos ocasionados á calidade da auga do río e do abastecemento.

En concreto, a Xunta declarou o martes día 13 a emerxencia sobre a situación do río e as súas consecuencias no abastecemento. A través desta declaración, pódense adoptar as medidas necesarias para reducir os niveis de turbidez.

Ademais, a Administración sinalou que levaría a cabo as intervencións de emerxencia que se considerasen oportunas na estación de tratamento para conseguir que a auga volva ser apta para o consumo e se poida restablecer o servizo á poboación.

Tras o traballo de campo realizado na xornada do mércores polos especialistas en emerxencias ambientais e técnicos de Calidade de Augas, que percorreron o río para analizar a situación, agora estanse avaliando as medidas concretas que se poden adoptar.

Unha comisión, na que estarán representados os técnicos de Calidade de Augas da Xunta, a empresa responsable da xestión do encoro, o Concello de Pontedeume e a concesionaria do sistema de abastecemento municipal seguirá a evolución da situación.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta