Por E.P. | SANTIAGO DE COMPOSTELA | 21/10/2020 | Actualizada ás 15:20
Todos os grupos do Parlamento galego demandaron á Xunta --tras unha proposta do PSdeG-- a que estableza un procedemento normativo que permita a negociación bilateral para que a titularidade de terreos sen uso de Portos de Galicia pasen aos municipios que o soliciten.
Ademais, aprobouse unha emenda de adición do Bloque pola que se insta a que naqueles casos nos que os municipios reclamasen a Portos de Galicia a reversión da titularidade procédase de oficio a "a maior brevidade posible".
O deputado socialista Julio Torrado expuxo a problemática de concellos que teñen que pagar elevadas cotas para facer actividades deportivas, culturais ou comerciais en espazos sen uso portuario.
A este respecto, lamenta que Portos de Galicia "só cobra", pero "ninguén fai mantemento desas zonas". Por iso, incide na necesidade de que a Xunta habilite a reversión da titularidade, para o que fai falta "vontade política para alcanzar unha solución". Argumenta que esta situación se produce sobre todo nas comarcas do Salnés, Costa da Morte e A Mariña. Torrado ironiza con que é unha "curiosidade" que os "problemas" que pon Portos son a "alcaldes que non son do PP".
APOIO DE BNG E PP
A deputada do BNG Rosana Pérez mostrou o seu apoio a esta proposta, xa que hai unha interlocución "inexistente" entre Portos de Galicia cos municipios, que nos últimos anos "pasou a ser imposición ou, mesmo, en moitos casos conflito".
Pola súa banda, Teresa Egerique (PPdeG) xustificou o apoio do seu grupo a esta proposta socialista porque "non insta a nada novo que non se estea facendo" e dado que "xa existe un procedemento normativo", aínda que lamentou que sexa unha iniciativa "partidista" por parte do PSdeG.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.