Por Europa Press / Redacción | SANTIAGO DE COMPOSTELA | 24/10/2020 | Actualizada ás 13:44
A ferramenta GaliciaLe, a plataforma de préstamo dixital das bibliotecas da Xunta de Galicia, triplicou o número de usuarios desde o inicio da pandemia e tamén se duplicou o número de lectores usuarios en lingua galega.
Así o explicou o Goberno galego este sábado con motivo da celebración do día das bibliotecas, que, nesta ocasión, ten por obxectivo visibilizar a importante función estas dotacións culturais no acceso á cultura en calquera lugar e circunstancias, como as derivadas da pandemia.
Neste sentido, desde que, no confinamento, o Goberno galego decidise facilitar as condicións de acceso, empregaron este portal preto de 24.000 persoas, das cales case 9.000 foron novos usuarios. Trátase dunha cifra que triplica a rexistrada en todo o pasado ano, no que o número de usuarios activos eran 7.300. Ademais, desde o mes de marzo tamén se incrementou a cifra de préstamos nun 20%, ata case 68.000 exemplares.
Ademais, a Xunta destacou que o número de persoas que fixeron uso do catálogo en galego creceu "notablemente". Desde que empezou a crise da covid-19, os usuarios activos en lingua galega son máis do dobre que os rexistrados o pasado ano.
Este crecemento en todos os indicadores propiciou que o Goberno galego estea a reforzar o número de licenzas, así como incorporando novos títulos co obxectivo de ofrecer unha maior variedade que dea resposta ás necesidades dos lectores, manter actualizada a plataforma e dar un mellor servizo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.