Rafa Villarino non quere a conciliación con Baltar "que se dedica a amparar mocións de censura"
"Tiña mellores cousas que facer, máis interesantes que acudir" ao acto de conciliación presentado polo presidente da Deputación de Ourense.
Por Europa Press / Redacción | SANTIAGO DE COMPOSTELA | 04/11/2020 | Actualizada ás 17:58
O portavoz socialista en Ourense, Rafael Villarino, rexeitou acudir ao acto de conciliación co presidente da Deputación, Manuel Baltar, polo xulgado de primeira instancia número dous. Villarino non acudiu á cita alegando que "é el quen ten que desculparse, pero coa cidade de Ourense".
Manuel Baltar presentou denuncia o 24 de setembro, no medio da crise local, na que acusaba de inxurias e calumnias a Rafael Villarino por unha entrevista publicada por La Voz de Galicia, a 9 de agosto, onde Villarino sinalaba ao líder popular como "corruptor" e culpable da moción de censura de Castrelo de Miño.
Por mor destas declaracións, Baltar reclama unhas desculpas públicas do socialista e unha indemnización de 10.000 euros. Baltar insistiu en que unhas acusacións "tan graves" non poden quedar impunes e que "como representantes de Administracións Públicas e de partidos políticos" o primeiro é "colaborar e cooperar co alicerce do Estado, a xustiza".
Neste sentido asegurou que ante "a contrastada incomparecencia de Villarino" solicitará que "o Estado de Dereito actúe en consecuencia con toda a forza da lei".
"TIÑA MELLORES COUSAS QUE FACER"
Pola súa banda, Rafa Villarino defendeu a súa non asistencia alegando que "tiña mellores cousas que facer, máis interesantes" que acudir a un acto creado "por unha persoa que se dedica a amparar mocións de censura".
Destacou que lle parece "pouco ético" que Manuel Baltar "pretenda sacar lucro das súas propias ameazas" e que "non hai nada que conciliar" posto que "só" é un "xogo accesorio" para tentar "disuadir a atención de que el está involucrado nesas mocións de censura" que se realizaron con "transfuguismo".
Ademais Villarino subliñou que "é innegable" que foron amparadas polo Partido Popular porque "el mesmo --en referencia a Baltar--- está a gobernar na Deputación cun tránsfuga". Villarino non descarta que sexa un intento de pór obstáculos no seu camiño á alcaldía "porque ven que non dá resultados a proposta da concentración" e porque "calquera estratexia lle vale a Manuel Baltar".
