Por E.P. | SANTIAGO DE COMPOSTELA | 20/11/2020 | Actualizada ás 19:48
As líderes de BNG, Ana Pontón, e Sinn Féin, Mary Lou McDonald, coincidiron en que, nun momento de reconfiguración a nivel europeo, os "grandes cambios" poden chegar "desde as periferias" ante o "fracaso" dunha Europa configurada en torno "aos Estados" e aos "grandes centros de decisión".
Pontón e McDonald, primeiras mulleres que encabezan as principais organizacións nacionalistas de Galicia e Irlanda, compartiron unha conversación en liña organizada pola Fundación Galiza Sempre e que estivo dirixida por Xabier Macías.
Así, galega e irlandesa abordaron a actualidade desde a mirada dos seus respectivos países, marcada pola crise da covid-19 ou a reconfiguración do proxecto comunitario coa saída do Reino Unido da Unión Europea.
Neste punto, Mary Lou McDonald sinalou que o voto a favor do 'Brexit' debeuse á existencia de "un nacionalismo inglés estreito" pero tamén como resposta "aos fracsaso da UE" que, segundo a irlandesa, "puxo o mercado por encima de todo" a través dunha "superestructura federal que rouba capacidade de decisión".
Tras cualificar de "moi perigoso" o papel xogado polo primeiro ministro británico, Boris Johnson, ao levar ata o "último momento" a saída do Reino Unido da UE, McDonald apuntou que o 'Brexit' devolveu "ao centro do debate doméstico" a división de Irlanda.
Para a líder nacionalista, trátase dun debate, o da reunificación de Irlanda, que debe encararse, aínda que evitou pór prazos para a celebración dun referendo, pois, aínda que a súa posibilidade está recollida nos tratados de paz, o paso último para a súa autorización ha de proceder de Londres.
"O sistema europeo deberíanos apoiar na persecución do noso dereito pola autodeterminación nacional", sentenciou a presidenta do Sinn Féin, que puntualizou que Irlanda non está "illada" nesta "loita", senón que esta é compartida con "outros pobos" como o galego.
Pola súa banda, a portavoz nacional do BNG, Ana Pontón, considerou que a Unión Europa como "unha estrutura de Estados fracasou" e que o proxecto debe "repensarse" se se pretende "dar unha solución" aos problemas dos pobos europeos.
"Hai que camiñar cara a unha Europa social, que ten que ser a Europa dos pobos", sentenciou a líder frontista, que lembrou que o dereito de autodeterminación está considerado "como un dereito fundamental".
Nesta liña, tras censurar que no caso de Cataluña a UE tomase partido "por unha decisión" que "non" pode aceptarse desde postulados "demócratas", Ana Pontón apostou por romper con "as políticas pensadas para favorecer aos estados centrais". "É a clave para construír unha Europa social", apostilou.
COVID E FEMINISMO
Ademais do futuro de Europa, McDonald e Pontón tamén abordaron a crise do covid ou a situación do feminismo. No seu caso, como primeiras mulleres que lideran os seus respectivos partidos, apelaron a non dar por feito "que xa se conseguiu moito" na loita pola igualdade, pois seguen estando sobre a mesa problemas como a violencia machista ou a brecha de xénero, cuxa vixencia, din, quedou en evidencia durante esta pandemia.
"As que nos sacaron adiante estes meses foron mulleres precarizadas. Con elas temos unha débeda", sentenciou Pontón, á que se sumou Mary Lou McDonald, que consideraría "imperdoable" que a crise do covid "non sirva para corrixir" a problemática do traballo precario. "Se non o consegue esta crise, non se o que poderá facelo", engadiu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.