Pontevedra propón un Nadal "seguro e intenso" con actividades de rúa itinerantes
A programación dará comezo este venres e prolongarase ata o 10 de xaneiro.
Por E.P. | PONTEVEDRA | 02/12/2020 | Actualizada ás 17:16
A concelleira de Festas do Concello de Pontevedra, Carme da Silva, presentou este mércores a programación "segura e intensa" de Nadal que comezará este venres co aceso da iluminación de rúa, e que se prolongará ata o próximo 10 de xaneiro polo centro da cidade, os barrios e as parroquias.
Carme da Silva comentou que a área de Festas "esforzouse en facer unha programación que contribúa a levantar o ánimo" da cidadanía "sendo conscientes das dificultades e das medidas de seguridade" pero co claro obxectivo de ser "un pouco máis felices" durante as festividades.
Outro propósito do Goberno local era "inxectar recursos económicos" no sector cultural e no comercio local, indicou Da Silva, que concretou que a programación de Nadal terá na Boa Vila dous escenarios principais: as rúas e o Teatro Principal.
Desde o 4 de decembro, nove grupos van facer máis de 30 espectáculos itinerantes polos barrios e rúas da cidade "para evitar posibles aglomeracións e problemas de aforamentos". Pola súa banda, o Teatro Principal acollerá a programación infantil con dous pases e nove espectáculos diferentes de 4 compañías. Carme da Silva resaltou que "é unha honra poder organizar esta programación de actividades itinerantes con grupos que son de Pontevedra e a súa contorna e poder contribuír a manter un sector tan afectado como o cultural e o dos espectáculos en vivo".
Ademais, 15 casetas integrarán o "poboado de Nadal" que Pontevedra instalará na Praza da Ferrería. Será un lugar no que, seguindo o ronsel dos tradicionais mercados do Nadal, poderanse adquirir todo tipo de produtos típicos destas festas. Case todos os postos serán do comercio local pontevedrés e neles, entre outras cousas, poderanse atopar adornos do Nadal, xoguetes ou postais.
Pontevedra recibirá ademais a visita de Papá Noel, o Apalpador e os tres Reis Magos. Iso si, non haberá recepcións nin cabalgatas. Todo iso dará comezo este venres, 4 de decembro, ás 18,30 horas co aceso da iluminación de Nadal na cidade. Ilumínanse 81 rúas e dispoñeranse máis motivos do Nadal "que nunca".
