A estratexia política de Anova divide as bases
As alianzas con forzas nacionalistas ou unha fronte ampla con partidos da esquerda enfronta ás distintas correntes desta formación. Haberá listas abertas a súa Coordinadora Nacional, pero algunhas sensibilidades poden quedar fóra.
- Anova e BNG falarán sobre un pacto soberanista
- A "longa noite de pedra" do nacionalismo galego
- O longo futuro de Anova
Por Xurxo Salgado | Compostela | 08/06/2013 | Actualizada ás 11:28
Anova-Irmandade Nacionalista afronta esta fin de semana a que é a súa primeira grande asemblea. Un cónclave decisivo que marcará a orientación e as teses politicas desta formación nacionalista para o futuro. Pero, a formación que lidera Beiras afronta esta primeira gran cita coas súas bases dividida.
Finalmente, non houbo acordo sobre o modelo político da organización. De feito, presentáronse case 180 enmendas ao documento político. Enriba da mesa hai fondas divisións sobre o modelo de "partido movemento" que se quere, é dicir, como debe de ser a convivencia interna das distintas correntes; e polo outro, a táctica de Anova con outras forzas políticas. E é neste punto onde xorden as principais diferencias.
Tres posturas
Polo momento hai tres posicións diverxentes; unha fronte ampla, unha gran coalición de forzas nacionalistas do Estado e unha coalición de forzas politicas nacionalistas galegas. A primeira proposta é compartida pola FPG ou Nova Esquerda Galega. Aposta por un pacto de Anova con EU e con outros partidos da esquerda anticapitalista do Estado seguindo o modelo que Anova xa puxo en marcha con EU en AGE nas pasadas autonómicas.
A segunda e a terceira opcións están defendidas, principalmente, por Encontro Irmandiño, o grupo máis numeroso dentro de Anova. Por unha banda hai quen propón un pacto con todas as grandes forzas nacionalistas estatais --ERC, Amaiur, BNG...--, e, pola outra, están os que só queren un pacto coas forzas nacionalistas galegas --BNG, CxG e forzas soberanistas--.
Nas últimas semanas os debates sobre esta cuestión teñen sido moi vivos nas comarcas e mesmo teñen provocado divisións internas. Un dirixente de Anova consultado por GC chegou a sinalar que este novo partido sairá dividido deste cónclave. "Non haberá ruptura, nin cisma. A xente vai ter sentidiño e seguro que imos todos a chegar a unha postura consensuada", apunta outra fonte consultada.
Moitos candidatos para a Coordinadora Nacional
Con todo, uns e outros recoñecen as divisións existentes en canto ao modelo organizativo e político. De aí, tamén, que non se chegara a un acordo sobre os membros da Coordinadora Nacional. Haberá listas abertas para un órgano de 75 persoas ao que se presentan 171. E é aquí onde tamén se medirá se, finalmente, o grupo máis numeroso cede antes os máis pequenos. "Pode darse o caso que haxa unha Coordinadora na que non estean representados os colectivos máis pequenos e mesmo o propio Mariano Abalo --líder da FPG-- pode quedar fóra", apunta un dirixente. "Isto é case imposible. Todos estarán dentro", apunta outra fonte.
Aínda que a maior parte das enmendas son para o documento político, o certo é que tamén se presentaron numerosas enmendas ao texto organizativo, á carta financieira e mesmo ao Regulamento da propia asemblea. De feito, Anova Teo --da que forma parte o alcalde deste concello e a quen todos sinalan coma sucesor de Beiras, Martiño Noriega-- presentou unha enmenda a totalidade das teses políticas.
Debate vivo e participativo
Sen embargo, e a pesares desta diferencia, os cadros de Anova insisten en suliñar que a "riqueza" desta formación é, precisamente, a "liberdade que a xente ten para debatir". "Aquí non vimos con acordos pechados como fan outros. Aquí a palabra é da militancia", engade un histórico militante consultado.
"Seguro que se chega a un gran acordo porque o que se trata é de crear unha gran cooperativa política de todas as formacións que integramos Anova", apunta outro dirixente que está convencido de que "todas as sensibilidades estarán presentes na Coordinadora Nacional".
