O Festival Novos Cinemas arrinca o martes cunha edición híbrida presencial e por 'Filmin'

O V edición de 'Novos Cinemas-Festival Internacional de Cinema de Pontevedra' arrinca o vindeiro martes cunha proposta híbrida que combinará as sesións presenciais no Teatro Principal e o Museo Provincial, con emisións por internet a través da plataforma 'Filmin'.

O acto de presentación deste evento, que se celebrará entre o 15 e o 20 de decembro, contou coa presenza do alcalde de Pontevedra, Miguel Anxo Fernández Lores; a presidenta da Deputación, Carmela Silva; o director da Agadic, Jacobo Sutil; e Suso Novás e Daniel Froiz, da dirección do festival.

Jacobo Sutil iniciou o acto destacando o "papel fundamental" do evento "difusión de primeiras e segundas obras" e aplaudiu a "capacidade de adaptación" da cultura galega durante a actual situación sociosanitaria.

Carmela Silva puxo o foco na seguridade dos eventos culturais e na provincia de Pontevedra como "lugar do Cinema" en Galicia, asegurando que "para a Deputación é unha obrigación apostar polo talento e o noso audiovisual permite que a sociedade poida desenvolver valores, xera actividade económica e emprego".

Finalmente Fernández Lores celebrou que o festival poida traer a Pontevedra as primeiras películas de vangarda de cineastas de todo o mundo e destacou que o certame "incorpora novas tecnoloxías para un evento que se desenvolve nunha cidade que aposta pola cultura".

Na súa intervención tanto Daniel Froiz como Suso Novás insistiron en que este festival quere ser un foco para os cineastas que comezan coa súa andaina no mundo profesional.

MARCA DE INSCRITOS

Nesta edición o festival bateu unha marca de proxectos incritos no LAB, o seu programa de asesoramento de obras en calquera fase de desenvolvemento, chegando a un total de 300, declarou Daniel Froiz.

Ademais, tamén detallou a proposta en liña do festival: a Sección Latexos, a Sección Oficial e a sesión especial "Pasaron por Novos Cinemas" estarán dispoñibles en Filmin e os encontros cos cineastas Andrés Goteira e Nuria Giménez tamén poderán seguirse en streaming a través das redes sociais do festival.

Suso Novás, responsable de programación, afirmou que esta foi unha edición para apostar por unha programación "diversa e vangardista" e que se atopan traballando para fortalecer o proxecto formativo, porque a educación de público novo é un dos seus "alicerces fundamentais".

PROGRAMA

Na quinta edición de Novos Cinemas a Sección Oficial acollerá unha selección de nove películas, na súa maioría inéditas en Galicia, que aspiran a representar un dos posibles diagramas do cinema contemporáneo máis creativo e arriscado.

Nesta sección competitiva poderánse ver, entre outras, "Se eu fose o inverno mesmo", de Xasmín López (Arxentina); "Dramarama", de Jonathan Wysocki (USA) ou "Fortezza", de Ludovica Andò e Emiliano Aiello (Italia).

A sección Latexos acolle desde a súa xénese obras de carácter máis fráxil e íntimo e incluirá películas como "Anunciaron treboada", de Javier Fernández Vázquez (España); "A última primavera", de Isabel Lamberti (España); "Mamá, mamá, mamá" de Sol Berruezo Pichón-Rivière (Arxentina) e a estrea en Europa de " Que fago neste mundo tan visual?", de Manuel Encoro (Arxentina).

Sala de cinema. JCCM