Dimiten sete membros da executiva do PSOE en Ortigueira por desavinzas co grupo municipal

Un total de sete membros da executiva do PSOE de Ortigueira presentaron a súa dimisión por diferenzas co grupo municipal.

Nun escrito, ao que tivo acceso Europa Press e que remitiron á executiva provincial e autonómica, aluden como motivos da súa decisión aos "feitos actuais que se están dando tanto no Concello", en alusión á perda de subvencións de varias entidades --como Aspromor, a Confraría de Espasante, o club de fútbol da localidade ou varias entidades veciñais--, así como á "relación entre a executiva e o grupo municipal".

"Os esforzos que levamos feito para cambiar a situación non conseguiron un cambio de rumbo", lamentan. A súa dimisión foi presentada o pasado luns. Aseguran, ademais, que esta situación de desencontro era coñecida pola executiva provincial, liderada por Valentín González Formoso, e autonómica, a cuxo fronte está Gonzalo Caballero. "Vémonos obrigados a presentar a dimisión irrevogable como membros da executiva", explican.

A MAIORÍA DA EXECUTIVA

Esta misiva foi asinada polo presidente da executiva, Francisco Rodríguez Patiño; o secretario de Organización, Félix Antón Mosquera Bouzamayor; o secretario de Política Municipal, Jesús Matías Cornide Albo; o secretario de Administración, Andrés Piñón Vilela; o secretario de Formación, Aquilino Martínez Casal; a secretaria de Comercio, Dolores Pinón Pérez; e a secretaria de Asuntos Sociais, María Rosario Suárez Díaz.

Segundo os estatutos do PSOE, a dimisión de máis da metade dos integrantes da executiva dunha agrupación supón que se teña que convocar unha xestora. Actualmente como secretario xeral da agrupación exerce Juan Penabad, que é ademais o alcalde desta localidade, e que agora conta cunha executiva con tan só cinco membros, xa que antes destas dimisións contaba con doce membros.

Concello de Ortigueira.