Medio Rural rexeita unha PAC "mediterránea" e busca unha nova posición da cornixa cantábrica
A Xunta habilitará "proximamente" unha nova vía, a través do teléfono 012, para tramitar as curtas de madeira de uso doméstico.
Por E.P. | SANTIAGO DE COMPOSTELA | 23/12/2020 | Actualizada ás 20:04
O conselleiro de Medio Rural, José González, mostrou o seu rexeitamento a unha "orientación mediterránea" da política agraria común (PAC) á vez que avanzou que traballa "para fixar unha nova posición da cornixa cantábrica", xunto a Asturias, Cantabria e País Vasco. A preguntas da deputada do BNG María del Carmen Aira, quen criticou que o conselleiro apelase ao papel do Goberno central nas negociacións, este informou de que tamén traballa xunto ás organizacións agrarias para elaborar esa "nova posición".
Neste sentido, e "da mesma forma" que augurou que se poñerán de acordo "diferentes gobernos", lanzou "a petición de que todo o Parlamento faga unha solicitude ao Goberno de España para defender os intereses de Galicia". "Non queremos unha PAC de orientación mediterránea", incidiu, antes de reclamar unha política "que defenda as explotacións gandeiras de carácter familiar, que son as que vertebran o rural galego".
CURTAS DE MADEIRA
Por outra banda, e ante as cuestións do socialista Martín Seco, anunciou que a Xunta vai habilitar "proximamente" unha nova vía, a través do teléfono 012, para tramitar as curtas de madeira de uso doméstico. Este servizo telefónico engádese ao procedemento telemático envigor, que permite realizar esta tramitación de forma dixital, apunta a consellería.
