Piden un Nadal sen petardos e foguetes para non alterar a animais e persoas vulnerables
A asociación Libera reclama a Xunta e concellos "alternativas" de lecer a estes artefactos
Por Europa Press / Redacción | SANTIAGO DE COMPOSTELA | 24/12/2020 | Actualizada ás 12:05
A asociación animalista Libera iniciou este xoves a súa campaña '#CeroPetardos', coa que pretenden alertar dos "múltiples efectos negativos" do lanzamento de foguetes e artefactos similares. A asociación pretende disuadir así á poboación de utilizar estes espectáculos de fogos artificiais durante o Nadal e pediu á cidadanía que busque "alternativas" para celebrar estas festas.
Tal e como informou a agrupación animalista nun comunicado, os estrondos deste tipo de artefactos son "perigosos" para diferentes colectivos da sociedade, "desde bebés e persoas maiores ata aqueles cidadáns con Trastornos do Espectro Autista (TEA) ou con hiperacusia".
Así, sinalou, estas detonacións poden xerar reaccións de ansiedade e terror. "O estoupido dun foguete pode chegar a xerar 190 decibeis, moi por encima dos 65 que recomenda a Organización Mundial da Saúde (OMS)", lembrou Libera. Ademais dos trastornos que poden provocar estes artefactos nas persoas, a asociación indicou que poden provocar "moitos danos" aos animais, cuxo sistema auditivo "é máis sensible", xa que pode provocar reaccións de pánico e medo.
Os animalistas tamén se referiron ao impacto sanitario provocado polas detonacións destes espectáculos, xa que "moitos inclúen durante a súa fabricación o emprego de metais pesados carcinóxenos" que xeran as cores rechamantes e características dos fogos artificiais, ademais de liberar fumes metalíferos que, engadiron, poden chegar a causar problemas respiratorios.
Por iso, pide un "compromiso" por parte de concellos e da Xunta para "reflexionar sobre o modelo de lecer público" e deseñar programas "que non inclúan actividades que poidan xerar medo en parte da Sociedade nin nos animais".
