Por Galicia Confidencial | SANTIAGO DE COMPOSTELA | 12/01/2021 | Actualizada ás 22:26
A terceira vaga de covid segue avanzando e afecta xa mesmo aos hospitais da comunidade galega. Segundo informa CIG-Saúde, os tres hospitais pertencentes á área sanitaria de Santiago contan neste momento con gromos rexistrados de Covid-19, unha circunstancia que dende o sindicato vencellan á tan denunciada “precariedade” no seo da actividade hospitalaria.
Segundo subliñan dende o sindicato, “a falta de medidas preventivas e dunha organización adecuada por parte da Xerencia” estaría a provocar o “encadeamento” de varios gromos de coronavirus, que, de acordo coas mesmas fontes, contan xa con “gran afectación entre doentes e profesionais”. “Neste momento, hai gromos nos tres hospitais do CHUS: na unidade de Somática do Psiquiátrico, na planta 2a Dereita do Hospital de Conxo, e no andar 5aB do Clínico”, explican.
A ampla incidencia reportada polo sindicato está a provocar mesmo deficiencias no fluído de osíxeno debido ao “grande ingreso de pacientes respiratorios”. Ante estas circunstancias, o sindicato considera que "a área sanitaria entra na terceira vaga de contaxios coa mesma precariedade laboral e a mesma mala xestión sufrida nas anteriores", xa que, segundo subliñan, "a Xerencia non fixo os deberes, non corrixe deficiencias e non aplica as medidas preventivas adecuadas".
A este respecto, denuncian que a xerencia oculta información para evitar que as e os delegados de prevención de riscos poida facer un seguimento dos gromos, xa que non desglosa os datos de pacientes e profesionais por categorías profesionais e servizos e tampouco mantén reunións periódicas co Comité de Seguridade e Saúde e coa Comisión de
Centro a fin de solucionar as distintas problemáticas existentes. "Non é posíbel que a día de hoxe non existan unhas medidas preventivas de carácter organizativo nas unidades, que estean os profesionais con déficit de información e formación e que sigan a escatimar en EPI, como as máscaras de FPP2, a pesar das queixas reiteradas das traballadoras mediante escritos e mensaxes de correo electrónico á Xerencia", subliñan.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.