Galicia entra de cheo na terceira onda: supera xa os mil novos casos e os 10.000 activos
A positividade mantívose por riba do 9 % nos últimos tres días. Récord de probas PCR realizadas (10.752) e de positivos (1.025). Hai 34 pacientes ingresados máis que o día anterior e as hospitalizacións en UCI crecen un 30% en 7 días
Por Galicia Confidencial | A Coruña | 14/01/2021 | Actualizada ás 11:17
Galicia superou xa os 10.000 casos activos tras máis de 1.100 novos contaxios en 24 horas.Unhas cifras que sitúan ao país na terceira onda con cifras de récords e que non paran de crecer desde o Nadal. Precisamente, foron estas datas, con infinidade de xuntanzas familiares o que está motivando que os casos se disparen.
De feito, Galicia leva tres xornadas consecutivas batendo récords de contaxios e de subas de casos. Este xoves o Sergas rexistrou máis de 1.190 novos contaxios, dos cales 1.025 foron confirmados por PCR, a maior cifra dende que hai datos oficiais.
O crecemento de casos é máis aguilloado nas áreas sanitarias das dúas grandes cidades de Galicia, A Coruña e Vigo, que achegan case a metade dos novos positivos nunha xornada na que empeoran os parámetros de todos os distritos sanitarios (salvo Ferrol) con aumentos no cómputo de hospitalizados e de casos diagnosticados. Así, a Coruña ten 2.469 (+209), logo Vigo: 1.893 (+173), Ourense: 1.348 (+116), Santiago: 1.983 (+97), Lugo: 945 (+55), Pontevedra: 867 (+35) e Ferrol: 710 (+51).
PRESIÓN HOSPITALARIA
En comparativa coas cifras de hai 7 días, o número de ingresados nos hospitais galegos creceu un 25% no cómputo global e un 30% nas unidades de coidados intensivos. O maior número de hospitalizados concéntrase un día máis na área da Coruña-Cee, que suma 20 novos ingresados que elevan a 150 o total con 27 deles en coidados intensivos (+5). Tamén alcanza a centena o distrito de Santiago-Barbanza, que acolle a 100 pacientes nos seus hospitais (+1), 8 na UCI (+2).
Ferrol é o único distrito sanitario no que non aumenta o total de hospitalizados (mantense en 79) aínda que si o fan a pacientes UCI ata os 5 (+1). Tras as áreas coruñesas está Vigo, que contabiliza 69 pacientes (+3), 22 en críticos (sen cambios).
En Pontevedra tamén repuntan ata os 60 hospitalizados (+3), aínda que se relaxa minimamente a presión sobre a UCI con 9 pacientes (-1). En Ourense soben a 53 os ingresados con coronavirus (+5), dos cales, 7 precisan coidados intensivos (+3); mentres que os hospitais de Lugo suman dous novos pacientes ata os 34, 3 deles en críticos (-1).
PCR E POSITIVIDADE
A deste xoves supón unha nova xornada de marca en Galicia, que bate o pico de contaXios por terceira vez en seis días. Foron 1.025 os casos detectados nas 10.752 probas PCR practicadas nas últimas 24 horas (831 test máis que o día anterior).
Estas cifras sitúan de novo á Comunidade galega en valores similares aos de principios de abril en canto á taxa de positividad das probas PCR. A porcentaxe de positivos das probas practicadas ata as 18,00 horas do mércores foi, por tanto, do 10,3%, o dobre do establecido pola OMS para dar por controlada da pandemia, un limiar do que Galicia non baixa desde o 24 de decembro.
Por áreas, os sete distritos sanitarios galegos situáronse por encima deste baremo coa Coruña (13,5%) e Pontevedra (13%) coas taxas máis altas que, en todo caso, só baixaron do 8% en Lugo (7,8%).
