Por que se decidiu pechar as universidades ata o 17 de febreiro e non institutos e escolas?
A decisión afecta tamén a conservatorios ou escolas de idiomas, cunha "ampla mobilidade" por ter alumnos de distintos municipios.
Por Europa Press / Redacción | Santiago de Compostela | 26/01/2021 | Actualizada ás 13:01
As tres universidades galegas renovarán a súa actividade lectiva o próximo 8 de febreiro --e ata o 17-- de forma en liña para "reducir a mobilidade" dos estudantes que deben desprazarse ata os campus situados nas cidades galegas para asistir a clase, aínda que non se "cuestionan as medidas" implantadas internamente nos centros para previr contaxios debido aos desprazamentos masivos que supoñen o inicio do curso universitario.
Así o explicou este martes o conselleiro de Educación, Román Rodríguez, tras unha reunión coa xunta autonómica de directores para trasladarlles as decisións en materia educativa que tomou o comité clínico. As novas medidas tamén foron comunicadas xa aos reitores das tres universidades galegas, que manifestaran con anterioridade que as institucións estaban "preparadas para dar o salto ao ensino virtual" se era necesario, dixo Rodríguez.
A idea básica das novas medidas, explicou o conselleiro, é "reducir a mobilidade das persoas". Por iso, tívose en conta que as sedes universitarias están "localizadas nas sete cidades" galegas e "hai un número significativo de desprazamento de mozos" entre unha cidade e outra ou ben desde municipios máis pequenos para acudir a clase, algo que pretende evitarse con esta medida.
En todo caso, Román Rodríguez afirmou que "non hai un cuestionamiento das medidas internas" postas en marcha por estas institucións para previr contagios, se non o interese por "reducir a mobilidade a estes centros universitarios e as interaccións sociais".
ENSINOS DE RÉXIME ESPECIAL
Esta decisión, así mesmo, fíxose extensiva a ensinos de réxime especial, como conservatorios, escolas de idiomas, de danza ou de deseño, que comezarán xa con educación en liña e estenderana, do mesmo xeito que as universidades, polo menos, ata o 17 de febreiro.
Este luns, Educación comunicou a decisión aos directores destes centros, que manifestaron que "están preparados para manter o ensino" en réxime virtual; así como a sindicatos da mesa sectorial e a asociacións de nais e pais, ademais da a xunta de directores este martes.
