Por Europa Press / Redacción | Santiago de Compostela | 26/01/2021 | Actualizada ás 17:44
A Xunta reuniuse este martes con representantes de Endesa para esixirlles a análise de solucións que permitan que a planta das Pontes sexa viable. En concreto, tratouse dunha reunión a nivel técnico, entre técnicos da Xunta --a través do Inega-- e do Idae con técnicos de Endesa para avaliar as probas con biocombustibles realizadas na central térmica das Pontes.
Nas súas conclusións, Xunta e IDEA "confirman que as probas foron positivas, e por tanto viables desde o punto de vista técnico e ambiental", segundo destacan ontes da Vicepresidencia Económica da Xunta.
Trasladadas estas conclusións aos representantes de Endesa na comisión técnica desta mañá, o departamento de Francisco Conde entende "que a empresa debe analizar solucións que permitan que a planta sexa viable desde o punto de vista económico e garantir por tanto a continuidade da actividade na central das Pontes".
Pola súa banda, fontes da compañía evitan opinar sobre este encontro técnico e remiten a novas reunións que se celebrarán ao longo da presente semana.
Endesa certificou o pasado martes que as mesturas de biocombustibles e carbón que estivo probando na súa central térmica das Pontes non permiten prolongar a vida da instalación debido á súa inviabilidade "ambiental, técnica e económica", o que, ao contrario do que sostén o Goberno galego, para a empresa confirma o proceso de peche para a planta.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.