Por Europa Press / Redacción | Santiago de Compostela | 05/02/2021 | Actualizada ás 12:12
A sociedade mercantil estatal Acuaes, dependente do Ministerio para a Transición Ecolóxica, a Consellería de Infraestruturas da Xunta e o Concello de Santiago rubricaron este venres, nun acto telemático, o convenio para a execución e explotación da nova estación depuradora de augas residuais da Silvouta, unha instalación que contará cun investimento previsto de 68 millóns de euros e que supón saldar "unha débeda pendente" coa capital galega, tal e como dixo a conselleira Ethel Vázquez.
No acto de firma, ademais da responsable autonómica de Infraestruturas, participaron a directora xeral de Acuaes, Rosa Cobo, e o alcalde de Santiago, Xosé Sánchez Bugallo, e foi en presenza do secretario de Estado de Medio Ambiente, Hugo Morán.
Esta firma avanza nun proceso iniciado hai dúas décadas, que, finalmente, logrará que a depuración das augas residuais de Santiago sexan compatibles coas condicións de vertedura ao río Sar que esixe a normativa vixente, especialmente no relativo á eliminación de nutrientes, resolvendo ademais os problemas de capacidade hidráulica da actual depuradora e obtendo unha redución eficiente da carga contaminante.
CAPACIDADE PARA 277.000 HABITANTES
Tal e como lembrou Rosa Cobo, este convenio encamiña cara á solución a un problema "longamente demandado" polo Concello de Santiago e que iniciou a súa catalogación como de interese no ano 2001, hai dúas décadas.
A actuación inclúe as obras de construción dunha depuradora que dará servizo a unha poboación de 277.000 habitantes equivalentes --a actual cobre 103.000--, así como a conexión á rede de colectores existentes e a execución dunha nova acometida eléctrica compatible coas necesidades enerxéticas da nova instalación e dotada dunha subministración eléctrica de respaldo.
Tras a firma, a conselleira Ethel Vázquez destacou a implicación do tres administracións, que colaboraron para "saldar esta débeda pendente" con Santiago de Compostela. Para a conselleira, a de hoxe é unha "excelente noticia" que demostra que "os proxectos estratéxicos deben de ser froito de grandes acordos".
BUGALLO
Pola súa banda, o alcalde de Santiago, Xosé Sánchez Bugallo, dixo este venres que será a Corporación do Concello de Santiago do 2025 a que deberá decidir sobre se a nova depuradora da Silvouta implica ou non unha subida da factura da auga. "Agora están abertas todas as posibilidades para non comprometer á futura Corporación que salga das eleccións do 2023", sinalou.
Así, Bugallo explicou que, para entón, o Concello poderá decidirse por "repercutilo na tarifa", por asumir o custo cos seus orzamentos ou por un sistema mixto. En calquera caso, isto materializaríase "a partir de 2026", cando se espera que a depuradora da Silvouta --que tamén dará servizo ao Milladoiro, en Ames-- estea xa operativa.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.