Feijóo: "As autonomías asumimos as responsabilidades que non asume o Goberno"
Reivindica ao PP fronte a un PSOE que "non é" constitucionalista, mentres apela a unha Cataluña "libre de populismos de todo signo"
Por Europa Press / Redacción | Santiago de Compostela | 07/02/2021 | Actualizada ás 15:44
O presidente da Xunta e do PP de Galicia, Alberto Núñez Feijóo, afeou ao Goberno central que "abdique" nas comunidades autónomas as súas responsabilidades na xestión da pandemia do coronavirus, o "momento máis complicado da historia de España desde a Guerra Civil".
"Desde as autonomías demos resposta. Somos Estado e demostramos que sabemos asumir as responsabilidades que o Goberno non asume nestes momentos de dificultade", aseverou Feijóo este domingo, durante a súa intervención de maneira telemática nun acto de campaña desenvolvido en L'Hospitalet de Llobregat (Barcelona).
Foi un mitin convocado polo líder nacional do PP, Pablo Casado, para arroupar a Alejandro Fernández como candidato á Presidencia da Generalitat nas eleccións catalás do 14 de febreiro. Á parte do mandatario galego, participaron o resto de presidentes autonómicos populares: Juanma Moreno (Andalucía), Juan Jesús Vivas (Ceuta), Isabel Díaz Ayuso (Madrid), Fernando López Miras (Murcia) e Alfonso Fernández Mañueco (Castela e León).
Durante a súa intervención, Alberto Núñez Feijóo agradeceu a Casado que traballe "sen descanso" por ofrecer "o constitucionalismo que non falla", á vez que destacou ao PP como un partido que "naceu para servir á España constitucional".
"Unha nación con distintos pobos, con distintas linguas, con distintas sensibilidades, con distintas culturas... En definitiva, unha España diversa, a España autonómica. Esa España que se configurou na Constitución como o país máis descentralizado da Unión Europea e, probablemente, o máis descentralizado do mundo", explicou.
