Por E.P. | SANTIAGO DE COMPOSTELA | 15/03/2021 | Actualizada ás 19:46
Endesa comprometeuse a trasladar á mesa na que están presentes os transportistas do carbón e os sindicatos CIG, UGT e CC.OO. --como representantes dos traballadores das empresas auxiliares-- un documento coas súas propostas para ambos os colectivos ante o peche previsto da central das Pontes.
No mediodía deste luns, 15 de marzo, Endesa mantivo un encontro telemático no que tamén estivo presente a Xunta, a través da directora xeral de Relacións Laborais, Elena Mancha, e o Concello das Pontes de García Rodríguez, coa edil de Industria, Ana Pena (PSOE).
"Logramos o compromiso de Endesa de facer chegar un borrador coas súas propostas", detallou a Europa Press o presidente da Asociación de Transportistas do Carbón das Pontes (ATCAP), 'Cholo' Bouza. Este colectivo leva desde o 4 de marzo bloqueando cos seus camións o acceso á central térmica.
"Conseguimos sentar nesta mesa á empresa grazas á presión que realizamos durante estes días", valora. "Imos continuar cos camións ás entradas, agardando por ese documento que quedaron de trasladarnos, e que nos interesa ás dúas partes que sexa á menor brevidade", agrega Bouza.
AUXILIARES
En canto á reclamación de garantía de emprego para os traballadores das empresas auxiliares, un representante dos sindicatos indicou, tamén en declaracións a Europa Press, que: "Estamos pendentes da elaboración dun documento que as auxiliares reclamabamos para a garantía de emprego e prioridade nos proxectos de futuro, tanto no proceso de desmantelamento como noutras iniciativas industriais que teñan que ver con Endesa".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.