Mar defende a estabilidade ou alza de cotas das principais especies en augas compartidas con Reino Unido

Quintana participa na reunión do Consello Consultivo, preparatoria para o encontro de ministros da UE da próxima semana

Por E.P. | Santiago de Compostela | 16/03/2021 | Actualizada ás 21:17

Comparte esta noticia

A conselleira do Mar, Rosa Quintana, participou, este martes por videoconferencia, no Consello Consultivo de Política Pesqueira para Asuntos Comunitarios, no que se abordaron as negociacións bilaterais das posibilidades de pesca para 2021 nas augas compartidas entre a Unión Europea e o Reino Unido.

Así, Galicia defende a necesidade de que se manteñan ou incrementen as cotas de pesca das especies de alto valor para a frota galega como a pescada, o galo ou o rape; e máis despois dos recortes aprobados para este ano en augas do Cantábrico-Noroeste.

Quintana avogou pola mellora das propostas do Consello Internacional para a Explotación do Mar (CIEM) nestas pesqueiras, e pide un esforzo tamén nas especies accesorias para poder facer fronte ás dificultades derivadas da cesión dun 25% das cotas europeas ao Reino Unido no marco do acordo sobre o Brexit a cambio do acceso ás augas británicas durante só cinco anos, como é o caso dos intercambios de posibilidades de pesca entre países.

No encontro analizouse a proposta de acordo existente na actualidade, que supón a fixación duns totais admisibles de capturas (TAC) provisionais ata o 31 de xullo de 2021 baseados nas recomendacións do CIEM, á espera de que se consiga un acordo definitivo entre as delegacións europea e británica para esas augas compartidas.

En relación ás especies de augas profundas, como o ollomol e o alfonsino, entre outras, Galicia defende desde hai tempo a eliminación dos TAC, pois son poboacións de peixes sen actividade dirixida, é dicir, adoitan ser accesorias da actividade pesqueira, polo que son de escasa relevancia de captura e sen riscos de conservación.

Fotos Xunta / Mar / Videoconferencia Non Consello Consultivo De Política Pesqueira Para Asuntos Comunitarios. Xunta de Galicia / Europa Press
Fotos Xunta / Mar / Videoconferencia Non Consello Consultivo De Política Pesqueira Para Asuntos Comunitarios. Xunta de Galicia / Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta