Por Europa Press / Redacción | Santiago de Compostela | 28/03/2021 | Actualizada ás 18:53
A ministra para a Transición Ecolóxica e o Reto Demográfico, Teresa Ribera, publicou este domingo un fío no seu perfil de Twitter en galego para defender que a Lei de Cambio Climático e Transición Enerxética que está en trámite no Congreso "non afecta a ningunha das concesións xa outorgadas" na liña de costa "nin ás súas prórrogas legais".
Así respondeu a ministra despois de que se difundise por redes sociais un vídeo no que alerta fronte ao polémico artigo 18 deste novo texto legal, porque --denuncia-- "supón enterrar toda a industria do mar galego" e "outras edificacións" situadas en dominio público marítimo-terrestre, de titularidade estatal.
En concreto, este vídeo --non vén atribuído a ninguén, pero foi compartido polo perfil do PP de Pontevedra e do vicepresidente primeiro da Xunta, Alfonso Rueda-- acusa a PSOE e BNG de "vender" aos galegos con esta lei que provocará perdas económicas de "10.000 millóns de euros" e de deixar no aire "40.000 postos de traballo".
Tras esta publicación, a ministra para a Transición Ecolóxica empregou varias imaxes de paisaxes galegas que aparecen nesta peza para lamentar que se acuse "en falso" a esta Lei de Cambio Climático que "defende e incorpora garantías e cautelas para o litoral".
"Non afecta a ningunha das concesións xa outorgadas nin ás súas prórrogas legais. Non mintan nin asusten á xente, por favor, sexan responsables", reclama a través deste fío de Twitter no que emprega o galego.
Ademais, o vídeo menciona o caso particular da biofábrica de Ence na ría de Pontevedra, un asunto que --lembra a ministra-- depende do que determinen os tribunais, xa que a prórroga da concesión aprobada en 2016 polo Goberno de Mariano Rajoy foi obxecto de recurso ante a Audiencia Nacional.
"Lamento profundamente que para defender ese interese haxa quen acuda ao medo, á mentira e á demagoxia. A costa e Galicia son enormemente queridos no Ministerio para a Transición Ecolóxica e defendemos a súa correcta xestión e a prosperidade das súas xentes", conclúe.
APDR
A Asociación pola Defensa dA Ría (APDR) lamentou que a Xunta apoie a "ilegalidade" que supón a permanencia de Ence xunto á ría de Pontevedra fronte ao "ben común"
Despois de que a Xunta urxise ao Goberno estatal que convoque a mesa de diálogo sobre a biofábrica de Ence en Lourizán, a asociación, a través dunha carta aberta dirixida ao vicepresidente económico do Executivo galego, Francisco Conde, concluíu que para o Goberno galego o "primordial" é conseguir a permanencia da empresa na zona, mentres "cumprir a lei é secundario".
Así, reprobou que a Xunta pretenda abordar esta situación "coa máxima de 'ou en Lourizán, ou en Lourizán", que "invalida calquera mesa de diálogo". Tamén criticou que o Goberno central, durante a etapa do PP, "encartouse aos intereses empresariais" para permitir que Ence puidese continuar no seu emprazamento "concedéndolle unha prórroga ilexítima e contraria á Lei". Por iso, responsabilizou o PP e á empresa da situación á que se enfronta esta última.
Neste sentido, remarcou que a reforma da Lei de Costas realizada en 2013 establece que estas clases de terreos resérvanse para aquelas actividades que os precisen para levar a cabo, o que "non é o caso de Ence". Ademais, destacou que "o límite máximo de permanencia de 75 anos (...) vén fixado na Lei de Patrimonio do Estado", que resulta "de obrigado cumprimento para a fábrica de Lourizán".
Así as cousas, insistiu en que, se se retirase o artigo 18 da Lei de Cambio Climático, relativo á duración das concesións en terreos de dominio público-marítimo terrestre, a planta "seguiría tendo a súa continuidade en Lourizán comprometida pola lexislación vixente". Ante este contexto, a entidade preguntouse se o Goberno galego "vai esixir tamén que se eliminen estas leis" ou "seguirá buscando atallos para sortear a aplicación da lexislación a Ence".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.