Por Galicia Confidencial | SANTIAGO DE COMPOSTELA | 07/04/2021 | Actualizada ás 21:40
Nova lea entre a Consellería de Educación e os sindicatos do sector. A CIG-Ensino vén de acusar á Xunta de Galicia de incorrer nunha “violación dos dereitos do profesorado” a raíz da suposta negativa da administración autonómica a conceder reducións de xornada para aqueles docentes que teñan dificultades á hora de conciliar vida laboral e profesional porque, por exemplo, teñan ao seu cargo un menor de idade.
A denuncia da CIG-Ensino --destacan-- chega días despois de que a formación lle trasladara á Xunta o seu “malestar” ante a negativa a conceder reducións de xornada por garda legal. A administración autonómica, destacan, respondeu co envío das especialidades de secundaria nas que “non vai conceder nin permisos sen soldo nin reducións de xornada”. Son arredor de 20 especialidades.
“A medida de restrinxir o dereito a goza dunha redución de xornada para o coidado dunha menor maior a cargo supón unha violación dos dereitos do profesorado”, destacan dende a CIG. A este respecto, a formación subliña que aos docentes, “como ao conxunto das empregadas e empregados públicos, non se lle fixa ningún tipo de condición ou informe previo do seu centro de destino para poder exercer o dereito a reducir a súa xornada e o seu salario para atender unha crianza ou unha persoa maior a cargo”.
COLISIÓN DE DEREITOS
A formación sindical engade que, segundo a versión da Xunta, a negativa nace da “suposta
colisión de dous dereitos”: o do profesorado a ter esa redución e o do alumnado a recibir docencia. Para a CIG-Ensino esta xustificación é “improcedente e carece do máis mínimo rigor”. E subliñan, a modo de exemplo: “usando o mesmo argumento, estaría en disposición a Consellaría a non conceder permisos de maternidade ou paternidade?”
O problema estaría en que, nas especialidades sinaladas --e que poden ser consultadas na páxina do sindicato-- a limitación nas listaxes de substitución poñería moitas dificultades á hora cubrir as prazas. O pretexto non convence, con todo, á CIG, que engade, con respecto á negativa a recoñecer o dereito á redución de xornada: “entendemos que é unha medida abertamente ilegal e que se toma sabendo que os prazos de reclamación e mesmo de recurso á vía xudicial farían imposíbel o exercicio dun dereito relacionado coa garda legal dun ou dunha menor a cargo”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.