O peche de empresas dispárase en Galicia ata case un 30% no mes de febreiro
A creación de novas sociedades baixou case un 7% en relación ao mesmo mes do ano pasado.
Por Europa Press / Redacción | Santiago de Compostela | 14/04/2021 | Actualizada ás 12:10
O número de novas sociedades mercantís baixou un 6,9% en febreiro en Galicia en relación co mesmo mes de 2020, fronte ao aumento da media (+3,1%), ata un total de 335 compañías, segundo os datos que publica este mércores o Instituto Nacional de Estatística (INE).
As disolucións, pola súa banda, subiron un 29,2%, ata 186, delas 158 voluntarias, 17 fusións e 11 operacións clasificadas como doutro tipo.
As 335 firmas, que optaron todas elas pola opción de sociedade limitada, supuxeron a subscrición e o desembolso de 19,37 millóns de euros. Pola súa banda, ampliaron capital 114 sociedades mercantís, por 76,63 millóns: tres sociedades anónimas, por 10,46 millóns e 111 sociedades limitadas, por 66,17 millóns. Reducírono 48, por 71,89 millóns. Unha empresa desembolsou dividendos por 47.000 euros.
DATOS ESTATAIS
No conxunto estatal, o número de novas sociedades mercantís subiu un 3,1% en febreiro respecto ao mesmo mes de 2020, ata totalizar 8.786 novas empresas, a súa cifra máis alta en case dous anos, concretamente desde marzo de 2019.
Co avance interanual de febreiro, a creación de empresas regresa a taxas positivas despois de descender case un 10% en xaneiro. Nos meses máis duros da pandemia, a creación de empresas rexistrou caídas históricas, especialmente en abril de 2020, cando cedeu un 73%.
