A Xunta propón a alcaldes e sindicatos de Ferrolterra converter a comarca nun polo enerxético
Conde inicia contactos para avanzar nun Pacto de Estado por Ferrol no que sumar a todas as administracións
Por E.P. | SANTIAGO DE COMPOSTELA | 03/05/2021 | Actualizada ás 18:53
O vicepresidente segundo e conselleiro de Economía, Empresa e Innovación da Xunta, Francisco Conde, propúxolles a alcaldes e representantes sindicais das comarcas de Ferrolterra, Eume e Ortegal converter a estes territorios nun polo enerxético a través dos recursos e capacidades desta zona.
Así llo trasladou tras protagonizar este luns, 3 de maio, senllos encontros en Santiago de Compostela con rexedores do tres comarcas, moitos de maneira presencial e outros de forma telemática, e con responsables sindicais do norte da provincia da Coruña.
En ambas as reunións, que teñen o obxectivo de deseñar as bases dun Pacto de Estado por Ferrol, a Xunta suxeriu aos asistentes facer destas comarcas un polo enerxético, aproveitando "a existencia de man de obra cualificada, un tecido industrial con empresas que poderían exercer un efecto tractor e a presenza de industria auxiliar diversificada".
Dita iniciativa, segundo a Xunta, sería unha oportunidade para avanzar na transición ecolóxica e a transformación industrial que se promove baixo o contexto dos fondos europeos 'Next Generation' a través da produción de biocombustibles, o impulso do gas natural licuado (GNL) como fonte enerxética e o desenvolvemento de hidróxeno verde e enerxías renovables.
CONDE CHAMA Á UNIDADE
En ambos os encontros, Francisco Conde apelou á unidade de acción e á implicación de todas as administracións e axentes a través dun Pacto de Estado que coordine todas as políticas necesarias baixo un mesmo criterio: ofrecer respostas claras e definitivas ás necesidades de Ferrolterra.
