Por E.P. | SANTIAGO DE COMPOSTELA | 05/05/2021 | Actualizada ás 18:49
O presidente do Goberno galego, Alberto Núñez Feijóo, eloxiou este mércores o compromiso da arquitectura de Galicia coa recuperación urbana, paisaxística e coa sustentabilidade para deseñar os pobos e cidades do mañá.
Durante o acto de entrega dos Premios de Arquitectura e Rehabilitación de Galicia 2020, Feijóo reivindicou a implicación dos profesionais do sector na recuperación do patrimonio urbanístico, no embelecemento das localidades galegas e na posta en valor da cultura paisaxística.
Tamén remarcou a aposta pola sustentabilidade ambiental e a eficiencia, "sen sacrificar a funcionalidade nin a estética". Nesta mesma liña, incidiu na importancia da arquitectura como elemento dinamizador da economía, do turismo e da demografía, "un sector que ten moito que dicir na reconstrución económica" que se afrontará post pandemia.
Sobre este punto, o titular da Xunta lembrou que o Executivo autonómico leva anos desenvolvendo iniciativas en todas as frontes ---vivenda, urbanismo e paisaxe--, activando "medidas de país". "Plasmamos toda nosa política para os próximos 5 anos no Pacto Social pola vivenda, asinado en xaneiro, e que mobilizará máis de 1.080 millóns para beneficiar a 70.000 familias, ademais de contribuír a xerar ou manter 30.000 empregos", dixo.
Así mesmo, lembrou a convocatoria este ano de axudas a particulares, comunidades e concellos e a posta en marcha de actuacións directas de rehabilitación por case 45 millóns de euros. A estes recursos tamén hai que sumar, remarcou, unha liña de axudas específicas para promotores; axudas urbanísticas que recibirán 39 concellos de menos de 20.000 habitantes para infraestruturas municipais; e 1 millón para loitar contra o feísmo, a través de pequenas intervencións para emendar máis de 300 impactos paisaxísticos.
PREMIOS
Segundo o presidente do Executivo autonómico, todos estes obxectivos atopan o mellor reflexo nos proxectos galardoados nos premios autonómicos. "Recoñecemos a visión innovadora de arquitectos como Juan Ignacio Prieto, Faustino Patiño e Estefanía Grandal, artífices da nova escola infantil de Veigadaña, en Mos; así como a aposta pola eficiencia do proxecto de reforma do antigo hotel Galicia, no centro de Vigo, de Leonardo Llamas", expuxo, referíndose tamén ás iniciativas de recuperación levadas a cabo por Juan José Otero, Cecilia López, Juan Antonio Caridad e Isidro López.
Sobre Alfonso Penela salientou que hai "un Vigo contemporáneo que non se explica sen el, citando a recuperación do antigo Xeral, xa reconvertido en Cidade da Xustiza; e a rehabilitación premiada da vivenda da Praza dos Pescadores, "nese Vigo histórico que volve latexar".
E de Manuel Galego Jorreto, referente da arquitectura de Galicia, recalcou que "soubo hermanar nas súas obras a innovación e respecto pola tradición e paisaxe, entendendo sempre que a obra do arquitecto debía ser amiga da integración, non da ruptura co establecido". "Comprometido coa funcionalidade e a beleza; comprometido coa terra, cos valores e coa nosa cultura ata o extremo de poder dicir hoxe que as súas obras son xa patrimonio arquitectónico de Galicia", abundou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.