Pontevedra prepara o gran acto do atletismo galego cun campión mundial de 80 anos

O octoxenario galego Pepín Rioseco, campión mundial en 800 metros, acudirá á cita na vila pontevedresa.

Por Galicia Confidencial | SANTIAGO DE COMPOSTELA | 11/05/2021 | Actualizada ás 21:25

Comparte esta noticia

Pontevedra acollerá o vindeiro 22 de maio a grande cita do atletismo galego dos últimos meses. Nesa xornada terá lugar a celebración da XXXVII edición dos campionatos autonómicos de Clubs en categorías Sub 16 e Sub 20, que congregarán os principais atletas desas categorías en Galicia para, uns días despois, dar paso ao certame galego de categoría master.

Atletismo
Atletismo | Fonte: GC

Alí daranse encontro nomes como Pepín Rioseco, o ancián ferrolán que vén de bater o récord mundial de 800 metros, Esther Pedrosa e José Luis Otero Cepeda, nunha xornada que terá lugar o sábado 29 de maio e onde competirán os mellores clubs de Galicia en probas 100, 200, 400, 800, 1.500 e 3.000 metros, onde poñerán a proba a súa destreza con obstáculos, altura, lonxitude, triplo salto, pértega, peso, disco, xavelina, martelo e marcha

As probas do Campionato Galego Sub 20 desenvolveranse en horario de mañá, desde as 9:30 horas, e as do Galego Sub 16 en horario de tarde, a partir das 16:15 horas, agardándose a participación duns 300 deportistas dos nosos mellores clubs en cada categoría (ao igual que no Máster).

En palabras de Isidoro Hornillos, presidente da Federación Galega de Atletismo, “trátase duns campionatos moi importantes dentro da oferta anual da Federación Galega”, nunhas “pistas emblemáticas” e nunha cidade “que aposta polo deporte”. O presidente da FGA agradeceu a implicación da Xunta, o Concello e a Sociedade Ximnástica para facer posible a celebración duns campionatos “que serán un éxito”.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta