A Xunta impulsa en Vilanova de Arousa un campamento para fomentar o emprendemento e o deporte entre a mocidade

A Consellería de Cultura, Lingua e Xuventude deu comezo á primeira edición do programa 'Campas 360', unha iniciativa que busca fomentar entre a mocidade valores como a creatividade, o espírito emprendedor e o respecto ao medio ambiente a través dunha oferta que combina actividade física, tecnoloxía e lecer formativo.

O arranque do programa tivo lugar este sábado no Albergue Xuvenil das Sinas, en Vilanova de Arousa, onde a directora xeral de Xuventude, Lara Meneses, compartiu a xornada cos primeiros participantes: rapaces e rapazas de entre 12 e 14 anos, que pasarán tres días convivindo e desenvolvendo actividades deseñadas para estimular a súa creatividade e fortalecer as relacións sociais.

Segundo destacou Meneses, o obxectivo desta proposta é crear espazos "nos que a xuventude poida explorar novas formas de expresión, practicar deporte de forma sustentable e participar en dinámicas de grupo que fomenten a cooperación e a innovación".

O programa estrutúrase en 12 quendas, con grupos de ata 40 participantes por quenda, repartidas en tres localizacións e por franxas de idade. No caso das Sinas, o enfoque principal céntrase no deporte e o coidado do medio ambiente. Os demais albergues participantes son o Albergue Xuvenil Mariña Española de Sada, con actividades centradas no emprendemento xuvenil, e o Albergue Xuvenil LUG II, en Lugo, cunha programación orientada á creación dixital.

Cada sede acollerá catro quendas adaptadas ás idades dos participantes: de 12 a 14 anos, de 15 a 17 e de 18 a 30 anos, consolidando así un modelo de campamento que pretende ofrecer experiencias diferenciadas e enriquecedoras para cada etapa da mocidade galega.

Desde a Xunta salientan que 'Campas 360' é unha mostra da súa aposta por novas fórmulas de aprendizaxe e lecer que acompañen o desenvolvemento persoal dos mozos e mozas galegos nun contexto de convivencia activa.