Yolanda Díaz só obtén un 1,7% de apoios nunha enquisa do CIS sobre posibles candidatos a presidir España

O Centro de Investigaciones Sociológicas (CIS) preguntou na súa enquisa de maio por Iñígo Errejón (Más País), Yolanda Díaz (Unidas Podemos) e Isabel Díaz Ayuso (PP) como posibles presidentes do Goberno e o líder de Más País saíu gañador, por enriba mesmo doutros líderes nacionais como Santiago Abascal ou Pablo Iglesias. Pola súa banda, a galega foi elixida polo 1,7% dos enquisados, por detrás da presidenta madrileña.

O instituto que dirixe o sociólogo socialista José Félix Tezanos vén incluíndo unha pregunta nos seus barómetros sobre o político preferido para presidir o Goberno, unha táboa que sempre encabezou o actual xefe de Executivo, Pedro Sánchez.

Trátase dunha pregunta na que o CIS pon unha serie de nomes sobre a mesa, sen deixar que sexan os entrevistados os que mencionen espontaneamente a políticos. Na lista sempre se inclúe os líderes dos principais partidos de ámbito estatal, pero o CIS tamén pode mencionar a outros.

No Barómetro de Maio, celebrado inmediatamente despois das eleccións autonómicas de Madrid, o CIS non só volveu incluír ao portavoz de Más País, Íñigo Errejón, senón que tamén meteu á gañadora deses comicios, a 'popular' Isabel Díaz Ayuso, e á vicepresidenta Yolanda Díaz, a quen Pablo Iglesias sinalou como a súa sucesora como cartel electoral de Unidas Podemos.

E, detrás de Pedro Sánchez e Pablo Casado, o mellor clasificado é precisamente Errejón, preferido como presidente polo 6,8% dos enquisados, por diante de Santiago Abascal (Vox), que queda no 5,7%, e de Pablo Iglesias (Podemos) e Inés Arrimadas, ambos con 4,3 e 4,4%, respectivamente.

En canto a Isabel Díaz Ayuso, a presidenta madrileña queda no 2,4% e supera a Yolanda Díaz, que só é citada polo 1,7% dos enquisados.

É máis, entre os votantes de Unidas Podemos, Errejón é o segundo candidato preferido, por detrás de Iglesias e moi por diante de Alberto Garzón (EU) e de Díaz, e tamén é a segunda opción preferida entre os electores socialistas (un 8,9% fronte ao 0,9% de Iglesias e Díaz), segundo os datos cruzados en función do recordo de voto.