Por Europa Press / Redacción | SANTIAGO DE COMPOSTELA | 19/05/2021 | Actualizada ás 19:11
O BNG urxe ao Goberno a recuperar "todas as frecuencias" de trens en Galicia que foron suspendidas por motivo da pandemia, así como a aplicación dunha baixada de prezos nos billetes dos trens Avant que conectan as principais cidades galegas.
Nun comunicado, o deputado nacionalista Néstor Rego avanzou a presentación dunha batería de iniciativas no Congreso para instar á Administración central a retomar estas liñas afectadas pola redución de oferta xustificada pola caída de viaxeiros durante a crise santiaria.
Para Rego, a suspensión de frecuencias en liñas como a que une Ourense e A Coruña son "consecuencia" dun "modelo centralista que prima as conexións con Madrid en lugar de conectar as principais vilas e cidades de Galicia". "Esta liña é necesaria para os numerosos desprazamentos diarios de traballadores e traballadoras, así como de estudantes que se desprazan ata a Universidade de Santiago ou Coruña", remarcou o parlamentario frontista, que advirte de que a "escaseza" de oferta de mobilidade repercute no "éxodo" que padece o interior galego.
"Sen conexións co resto de cidades e vilas, tanto estudantes como traballadores e traballadoras vense obrigados a marcharse á cidade ou vila onde traballan", aseverou Rego, que demanda unha baixada de prezos nas tarifas de trens en Galicia.
Para apoiar a súa reivindicación, o deputado sinala a posta en marcha dos trens AVLO, que permitirán cubrir traxectos como Madrid-Barcelona ou Madrid-Valencia por 27 ou 18 euros, "o mesmo prezo que lle custa a un ourensán coller un tren de Ourense a Santiago".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.