Verín investirá 100.000 euros en renovar as zonas de xogo infantís
O concello vén de anunciar o comezo da primeira fase do plan de renovación, mantemento e mellora cuxo obxectivo é incrementar a seguridade dos usuarios, fomentar a accesibilidade e rehabilitar o mobiliario danado
Por X.M. Fernández | Verín | 22/05/2021 | Actualizada ás 11:00
Nos traballos para mellorar os parques infantís substituiranse un total de 1.500 m² de chan por caucho continuo e realizaranse os labores de mantemento e reparación de todas as zonas de xogo que así o precisen.
Segundo informou o alcalde de Verín, Gerardo Seoane Fidalgo, tras realizar un estudo pormenorizado do máis trinta parques infantís do casco urbano, centros educativos públicos e pobos do municipio, "poñeremos en marcha unha batería de accións de mellora entre as que se incluirán a substitución dos cauchos amortecedores de caídas que estean desgastados por caucho continuo, a actualización dos xogos infantís danados, así como os labores de mantemento e reparación de todas as zonas de xogo que así o precisen".
Seoane tamén quixo puntualizar que o importe necesario para a realización deste plan de renovación integral supoñerá un investimento total de 100.000 euros. Para este obxectivo levarase a cabo unha modificación de crédito orzamentario.
Pola súa banda, o concelleiro responsable da área de Mocidade, Diego Lourenzo Moura, explicou que con este plan búscase atender, de maneira integral e ordenada, á vixente petición veciñal de actualización das zonas de xogo infantís de competencia municipal. En palabras de Lourenzo Moura: "é de vital importancia dotar a todas as zonas de esparexemento infantil da vila e pedanías dunha mellora integral e equitativa. Debemos lembrar a importancia que teñen estes parques para os nosos menores xa que, ademais de ser espazos de lecer e diversión ao aire libre, compren un papel fundamental no desenvolvemento persoal e social dos nenos e nenas".
MELLORAS TAMÉN PARA ZONAS DEPORTIVAS
Desde o Concello de Verín, tamén se informou que se procederá á adecuación de varias das zonas deportivas exteriores municipais, realizando labores de mantemento do mobiliario deportivo, así como de substitución dos firmes deteriorados.
