Denuncia unánime no Parlamento ante a falta de conectividade dixital nos concellos
Tamén reclaman ante a Administración central que conte coas achegas de Xunta e entidades locais.
Por E.P. | SANTIAGO DE COMPOSTELA | 27/05/2021 | Actualizada ás 18:29
Os grupos con presenza na Cámara galega uníronse este xoves para denunciar a "nula ou insuficiente" conectividade a servizos dixitais que aínda padecen moitos núcleos de poboación nos 313 munipicios de Galicia.
A iniciativa, promovida polo Grupo Popular, saíu adiante cos votos de todos os grupos (BNG e PSdeG, ademais do PP) na Comisión 6ª do Parlamento de Galicia, celebrada este xoves.
Neste sentido, a proposición non de lei acorda trasladar esta denuncia ante o Ministerio de Asuntos Económicos e Transformación, ao que os grupos instan a "priorizar o despregamento de banda ancha" nas "zonas brancas" de áreas pouco poboadas e tamén naqueles puntos que non contan con esa catalogación pero "o son de facto".
Así mesmo, tamén reclaman ante a Administración central que conte coas achegas de Xunta e entidades locais cuxo traballo, como institucións "máis próximas á realidade e mellor coñecedoras das necesidades" do territorio no que se asintan, pode permitir actuar de mellor forma para eliminar a "fenda dixital".
