Feijóo reclama ao Goberno unha "resposta" ao compromiso de Portugal co Eixo Atlántico ferroviario

O presidente da Xunta de Galicia, Alberto Núñez Feijóo, reclamou este luns unha "resposta" por parte do Goberno de España ao compromiso expresado polo Executivo de Portugal co Eixo Atlántico ferroviario.

Así, o titular do Executivo galego aproveitou a súa intervención no acto de inauguración dunha nova sede da Universidade de Vigo, para lembrar os proxectos que a Xunta está a desenvolver na cidade, e para dar un toque de atención ao Goberno de Pedro Sánchez sobre a conexión ferroviaria no Eixo Atlántico.

A ese respecto, referiuse como "decisión estratéxica" do Executivo luso, de impulsar as súas conexións por tren na fachada atlántica ata a fronteira con Galicia, de modo que "é o primeiro goberno" do país veciño que "o explicita, concreta e compromete".

Ese compromiso, a xuízo de Núñez Feijóo, "necesita unha resposta do Goberno español" para poder facer realidade a conexión entre Vigo e Porto en menos dunha hora, e entre Vigo e Lisboa en tres horas. "Sería un antes e un despois para Galicia e para Portugal", salientou.

O presidente da Xunta, Alberto Núñez Feijóo, no acto de entrega do edificio 'Redeiras', nova sede da Universidade de Vigo, en Praza do Berbés.. DAVID CABEZÓN @ XUNTA DE GALICIA | Fonte: Europa Press