Máis de 200 millóns de euros enviados polo Estado a Galicia fornecerán o terceiro plan de rescate da Xunta

A Xunta de Galicia publicará a próxima semana no Diario Oficial de Galicia (DOG) a convocatoria do terceiro plan de rescate para os sectores afectados pola pandemia que financiará cos 234 millóns transferidos polo Estado para axudas directas.

Así o anunciou este mércores o presidente do Executivo autonómico, Alberto Núñez Feijóo, na rolda de prensa posterior á reunión do Consello, que activou a orde pola que se establece este plan de rescate.

Na súa intervención, Feijóo lamentou que, a pesar de ter o 7% dos autónomos, Galicia só reciba o 3,3% dos fondos destinados a axudas a este colectivo. "Unha vez máis acreditamos a discriminación negativa que sofre Galicia en practicamente todos os fondos que se transfiren para facer fronte á covid", sinalou.

O máximo mandatario autonómico, que avanzou que a Xunta anticipará o 100% das axudas e despois pedirá as comprobacións, lamentou tamén que os requisitos establecidos polo Goberno central limiten estes apoios a "aquelas entidades que teñan pagos pendentes". "Non estamos de acordo pero, por imperativo legal, así o temos que aceptar e tramitar conforme á lexislación estatal", apuntou.

Reunión do Consello da Xunta. DAVID CABEZÓN @ XUNTA | Fonte: Europa Press