Os balnearios galegos comezan a abrir despois de máis dun ano pechados pola covid

Balnearios galegos anuncian o inicio da súa "reactivación" ao empezar a abrir despois de máis dun ano pechados pola crise sanitaria da covid. En concreto, aos balnearios de Laias, Mondariz, Cuntis, A Toxa e Augas Santas vanse a sumar nas próximas semanas as reaperturas dos de Carballo, Lugo, Arnoia, Partovia e Dávila.

Diso informa a asociación de balnearios de Galicia, que acaba de celebrar a súa asemblea xeral ordinaria na Cidade da Cultura, en Santiago.

Nela, segundo indica, renovouse a confianza na súa actual xunta directiva, de modo que Marisol Espiño, directora de Termas de Cuntis, continúa como presidenta; Antonio Garaloces, do Balneario de Lugo, como vicepresidente; Jesús Garriga, de Caldas de Partovia, como secretario; e José Ramón Fernández, do Balneario de Carballo, como tesoureiro.

No comunicado, destacan que potenciarán 'Un descanso nos Camiños', un produto turístico que combina o Camiño de Santiago e a súa contorna coa oferta termal.