Os sindicatos reclaman á Xunta que manteña os 2.600 docentes contratados durante a pandemia
A CIG convoca unha protesta este mércores ante San Caetano en contra do recorte de persoal e do aumento de alumnos por aula.
Por E.P. | Santiago de Compostela | 08/06/2021 | Actualizada ás 15:31
Os sindicatos de profesorado reclamaron ao Goberno galego que manteña o próximo curso o reforzo de medios despregado nos centros educativos para garantir as chamadas 'medidas Covid' e, especialmente, os preto de 2.600 docentes contratados ao longo deste período académico.
Representantes de CC.OO Ensino, ANPE Galicia, FeSP UGT e CSIF trasladaron este martes en rolda de prensa a súa "alta preocupación" ante a ausencia dun protocolo concreto de cara á planificación do próximo curso e da "falta de resposta" da Consellería de Cultura, Educación e Universidade á súa petición para reunirse cos portavoces sindicais.
Un dos principais temores destas organizacións é a posibilidade de que a Xunta reduza os cadros de persoal deste ano e regrese a unha situación anterior á pandemia, xustificándose na nova distancia de 1,2 metros entre alumnos proposta na última reunión entre as comunidades autónomas e a ministra de Educación, Isabel Celaá.
PROTESTA EN SANTIAGO
A CIG-Ensino convocou unha protesta este mércores ante a sede da Xunta de San Caetano, en Santiago de Compostela, para denunciar a intención do Goberno galego de recortar persoal e de incrementar de novo o número de alumnos por aula, a pesar de que os mozos aínda non están vacinados e de que todo parece indicar que o próximo curso seguirá condicionado pola covid-19.
A central sindical reclama tamén que se manteñan os reforzos docentes deste curso, do mesmo xeito que os desdobres aplicados nos centros, para dar resposta ás consecuencias dun período "complicado" como foi o da pandemia sanitaria.
