Por E.P. | SANTIAGO DE COMPOSTELA | 09/06/2021 | Actualizada ás 15:21
O Parlamento galego acordou reclamar á Xunta un plan de acción global para a recollida e reciclaxe de residuos mariños, por mor dunha iniciativa do PSdeG no pleno da Cámara autonómica.
Defendida pola socialista Paloma Castro, a proposición non de lei pide tamén crear unha partida orzamentaria "específica" con fondos propios, "que complemente a participación de programas europeos e iniciativas privadas, para continuar implementando programas de recollida e recuperación de residuos mariños".
O obxectivo é chegar a actuar en 2023 na totalidade da costa galega, mediante incentivos financeiros ao sector do mar, segundo recolle o texto aprobado.
Un segundo punto solicita o desenvolvemento de campañas de información sobre o papel da cidadanía na loita contra a contaminación plástica e o lixo mariño.
O terceiro aspecto é o referido a elaborar un plan "específico" para a reciclaxe de todos os obxectos recolleitos, "xa sexan redes, cordas, plásticos, latas ou outros residuos", no que insta a incluír "a recollida unificada das artes de pesca a bordo dos buques en bolsas ou colectores" e a facilitar instalacións "adecuadas" nos portos.
Por último, expón unha avaliación anual das características e tipos de residuos recolleitos, co obxectivo de levar a cabo acciones de prevención.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.