Críticas á TVG pola cobertura dunha inspección pesqueira

O Consello Sectorial de Pesca de Ribeira, do que forma parte o concello gobernado polo PPdeG, carga contra a Televisión de Galicia pola emisión dun programa sobre un barco do municipio.

Por Galicia Confidencial | Ribeira | 19/11/2013 | Actualizada ás 09:35

O Consello Sectorial de Pesca de Ribeira acaba de censurar a inspección efectuada o pasado 17 de outubro de 2013 a unha embarcación pertencente á flota do sector do cerco deste concello; o buque "Manilo".

Ese día, este barco, con sede en Aguiño, foi sometido a unha inspección pesqueira por parte dos servizos competentes no porto de Laxe. Pero, un procedemento que se debería ter desenvolvido con normalidade converteuse, segundo esta institución, "en material para un espectáculo mediático", ao permitirse a gravación dos labores de inspección con varias cámaras da Televisión de Galicia.

"Estupor"

"Non podemos senón manifestar o noso estupor ante o desenvolvemento dun control de xeito tan inadecuado no que, lonxe de obrar coa máis mínima cautela, obrouse con total imprudencia, danando gratuitamente a imaxe e o bo nome da flota de Ribeira e a do cerco en particular", apunta nun comunicado. Desta institución tamén forma o Concello de Ribeira do que é rexidor o popular Manuel Ruíz Rivas.

Por iso, critica o tratamento informativo deste tema ofrecido polo espazo televisivo “Galicia 112” que, na súa emisión do 5 de novembro de 2013, "non só proporcionou unha información a todas luces incompleta sobre o caso, senón que ademais impediu ao armador do buque ofrecer a súa versión e defender os seus dereitos". "Tal foi así que os seus reiterados intentos de dar unha explicación por teléfono foron atallados pola condutora do programa cun 'se vostede quere reclamar calquera cousa está no seu dereito, pero este non é o lugar'”, engade.

"Espectáculos televisivos"

Por iso, o Consello Local de Pesca de Ribeira solicitoulle xa á Xunta de Galicia e á Delegación do Goberno en Galicia que se absteñan no futuro de amparar prácticas como as sufridas polo “Manilo”, "nas que a realización de labores de control e inspección pesqueira alimentan espectáculos televisivos co risco de criminalizar a actividade pesqueira". Tamén lle expresou á CRTVG a súa discrepancia co tratamento deste caso "ofrecendo unha información incompleta sobre os feitos".

Coa colaboració do medio colaborador Certo

2 Hermerico

Nom há direito a que o PP nom poda controlar perfeitamente o que vai ser emitido e o que nom, que se vai dizer e que nom , que impressom se dá e qual nom, que se manipule ou nom. Como se fossem umha organizaçom anti-sistema qualquer. Onde imos parar!

1 eusi

Manuel Ruiz, alcaldinho (por dizer algo) de Ribeira, estudou Dereito e nunca exerceu por incapacidade manifesta, assi que tivo que arrimar-se à política de baixa ralea para poder seguir vivindo do conto. Se tam mal lhe parece o espectáculo televisivo, por que nom se alporiçava quando se mandavam meninhos menores de idade a patrulhar polas rua de esse nojento Concelho? O de "nojento" é por obra e graça do PPaifoquismo mais radical, que converteram um centro urbano de estilo marinheiro que poderia ser foco de atracçom turística, num foxo de tijolos, ruas mal feitas e urbanismo selvagem reflexo do gosto do PP pola destruiçom.

1 Nonperdoar

Totalmente acreditado, chegaron a convertila rúa principal nunha barraca de feira. Da mágoa que se fagan tales parvadas nunha zona tan bonita. Non é raro que donde hai xente que poda facer iso, haixa tamén papanatas que queiman o monte con vestidos de camuflaxe e motos.